वार्सा, मङ्सिर २६ गते । पोल्यान्डका प्रधानमन्त्री डोनाल्ड टस्कले मङ्गलबार युक्रेनमा रुसको युद्ध अन्त्य गर्न शान्ति वार्ता यसै हिउँदमा सुरु हुनसक्ने बताउनुभएको छ ।
आफ्नो छिमेकी युक्रेनको दृढ समर्थक रहनुभएका टस्कले अर्को महिना युरोपेली सङ्घ (इयु) को अध्यक्षता सम्हाल्दै हुनुहुन्छ । उहाँले विदेशी अधिकारीहरूसँग हुने आगामी वार्ताहरूको पनि घोषणा गर्नुभयो ।
उहाँले मङ्गलबार युक्रेनी राष्ट्रपति भोलोदिमर जेलेन्स्कीसँग कुरा गर्ने र बिहीबार फ्रान्सेली राष्ट्रपति इमानुएल म्याक्रोनलाई पोल्यान्डमा स्वागत गर्ने बताउनुभयो ।
“हाम्रो (इयु) को अध्यक्षता राजनीतिक परिदृश्यका लागि सह–जिम्मेवार हुनेछ र सायद (शान्ति) वार्ताको अवस्था कस्तो हुनेछ जुन यही हिउँदमा सुरु हुन सक्छ, यद्यपि अझै केही प्रश्न छन्”, टस्कले पत्रकारहरूलाई भन्नुभयो, “आज मैले राष्ट्रपति भोलोदिमर जेलेन्स्कीसँग यस विषयमा कुरा गर्ने मौका पाउनेछु ।”
करिब तीन वर्षअघि रुसले आक्रमण गरेदेखि पोल्यान्ड युक्रेनको बलियो समर्थक बनेको छ ।
इयु र नाटो सदस्यहरूले किएभलाई पश्चिमी सैन्य सहायताका लागि महत्त्वपूर्ण रसद केन्द्रको रूपमा काम गर्छन् । टस्कले भन्नुभयो, “म्याक्रोन पर्सि सहरमा हुनुहुनेछ । उहाँ हामीलाई पेरिस वार्ताको नतिजाबारे जानकारी दिन चाहनुहुन्छ ।”
म्याक्रोन, जेलेन्स्की र अमेरिकी राष्ट्रपतिमा निर्वाचित डोनाल्ड ट्रम्पले शनिबार पेरिसमा त्रि–पक्षीय बैठक गर्नुभएको थियो । उक्त बैठकलाई टस्कले ‘छोटो तर महत्त्वपूर्ण’ भन्नुभयो ।
फेब्रुअरीमा चुनावअघि जनमत सर्वेक्षणमा शीर्ष स्थान ओगट्नुभएका जर्मन विपक्षी नेता फ्रेडरिक मेर्ज पनि किएभको भ्रमणपछि पोल्यान्ड आउनुहुने टस्कले जानकारी दिनुभयो ।
उहाँले स्क्यान्डिनेभियन र बाल्टिक सहयोगीहरूसँग ‘निरन्तर सम्पर्कमा’ रहेको बताउनुभयो । ती सहयोगीहरूले ‘पोल्यान्ड र पोल्यान्डको (इयु) अध्यक्षतामा युक्रेन र रुसबिच शान्ति–निर्माणका लागि नेतृत्वदायी भूमिका’ देखेका छन् ।
“मैले स्विडेनका प्रधानमन्त्रीसँग कुरा गरेँ र केही घन्टामै एस्टोनियाका प्रधानमन्त्री यहाँ वार्सामा हुनुहुनेछ”, टस्कले भन्नुभयो ।रासस/एएफपी
-original-thumb.jpg)
