गोरखापत्र समाचारदाता
काठमाडौँ, मङ्सिर २३ गते । अमेरिकामा बनेको नेपाली वेब सिरिज ‘घर बट इन अमेरिका’ को प्रचारात्मक गीत सार्वजनिक गरिएको छ । सिरिजको पहिलो सिजनका लागि तयार पारिएको विशेष गीत ‘अमेरिकामा घर छ’ सार्वजनिक गरिएको हो । यो गीतले अमेरिकामा बसोबास गर्ने नेपाली समुदायको जीवनशैली र आपसी सम्बन्धलाई चित्रण गर्छ । निसान भट्टराईको स्वर, अर्जुन कटुवालको सङ्गीत र डिपी खनालको शब्द रहेको यो गीतमा प्रज्वल खनालले पनि शब्द रचनामा सहयोग गर्नुभएको छ । गीतको भिडियोमा सिरिजका प्रमुख कलाकारलाई देख्न सकिन्छ ।
सिरिजमा नेपालबाट छोरी भेट्न अमेरिका पुगेका अभिभावक र लिभइन रिलेसनसिपमा रहेकी छोरीको कथा समेटिएको छ । सिचुएसनल कमेडी–ड्रामा विधामा निर्माण भएको यो सिरिजले अमेरिकामा बसोबास गर्ने नेपाली परिवारको जीवनमा आउने विभिन्न उतारचढावलाई रोचक ढङ्गले प्रस्तुत गर्ने निर्देशक तथा प्रमुख कलाकार विमलेश अधिकारीले बताउनुभयो । अरुणिमा र विमलेशसँगै राधा लम्साल, खेम शर्मा, आशिष दाहाल र रोजिना थापा जस्ता कलाकारले पनि सिरिजमा महत्वपूर्ण भूमिका निर्वाह गर्नुभएको छ ।
