शीतलहर प्रभावितलाई न्यानो कपडा मौज्दात राख्ने

जयकृष्ण यादव 

इनरुवा, मङ्सिर २० गते । जिल्ला प्रशासन कार्यालय सुनसरीले गृह मन्त्रालय, विपद् पूर्व तयारी तथा प्रतिकार्य शाखाको निर्देशन अनुसार जिल्लाका सबै सरोकारवाला निकायसँग समन्वय बैठक गरेको छ । गृह मन्त्रालयले दिएको निर्देशनको प्रभावकारी कार्यान्वयनको व्यवस्था मिलाउने सरोकारवाला निकायसँगको समन्वय बैठकले निर्णय गरेको छ । 

जाडो र शीतलहरको पूर्व तयारीमा जुट्ने सुनसरीमा जाडो र शीतलहरको पूर्व तयारीमा स्थानीय तहहरु जुट्न, जाडोका कारणले जनजीवन प्रभावित हुन सक्ने भएकाले त्यसको पूर्व तयारीस्वरुप स्थानीय तहहरुले बाक्लो कपडा, कम्बल, सिरक जाडोको मौसम तथा सम्भावित शीतलहरको प्रकोपबाट सर्वसाधारणलाई जोगाउन सबै स्थानीय तह र सम्बन्धित कार्यालयहरु तयारी अवस्थामा रहने तयारी गरेको छ । 

स्थानीय तहले न्यानो कपडा, आगो बाल्न दाउरा, जाडोमा उपयोग हुने सामग्रीहरु तयारी अवस्थामा राख्ने र आवश्यक औषधिको व्यवस्थासमेत सबै स्थानीय तहले मिलाउने निर्णय गरेको हो । जिल्ला प्रशासन कार्यालय, सुनसरी समेतले शीतलहर प्रभावितलाई आवश्यक पर्ने न्यानो कपडा आवश्यक मात्रामा मौज्दात राख्ने भएको छ । 

बैठकले शीतलहरको समयमा अत्यधिक चिसोका कारण रुघा, खोकी, पखाला, निमोनियाजस्ता रोगहरुबाट ग्रसित हुन सक्ने सम्भावना भएकाले जिल्ला अस्पताललगायत स्थानीय स्वास्थ्य चौकीहरुमा नेपाल सरकारले निःशुल्क वितरण गर्ने, सम्बन्धित औषधी तथा उपकरणको पर्याप्त मौज्दात सबै स्थानीय तहले राख्ने र आ–आफ्नो स्थानीय तहका एम्बुलेन्स तयारी अवस्थामा राख्ने निर्णय गरेको छ । 

प्रशासनले शीतलहरबाट सुरक्षित रहनका लागि सचेतनामूलक सूचना एवं जानकारी स्थानीय सञ्चारमाध्यममार्फत प्रसारण गर्ने व्यवस्था पालिकाहरुले मिलाउने निर्णय गरेको छ। चिसोबाट प्रभावित सर्वसाधारणलाई उपलब्ध गराउन स्थानीय तहको माग अनुसार जिल्ला प्रशासन कार्यालयको सिफारिसमा डिभिजन वन कार्यालयले सहुलियत दरमा आवश्यक दाउरा उपलब्ध गराउने, चिसो मौसमको समयमा गाउँ घरतिर आगो बाली घुर ताप्ने चलन रहेकोले उक्त घुरबाट आगलागी हुन सक्ने सम्भावनालाई मध्यनजर गरी सचेत हुँदै त्यस्ता घटनाहरूको लगत राखी सम्बन्धित निकायमा विवरण पठाउने, साथै राहत वितरणको कार्य बैंक मार्फत गरी सो को तथ्याङ्क स्थानीय तहहरुले अभिलेख राख्ने निर्णय गरेको छ । 

जिल्लामा सिटी सफारीको अव्यवस्थित संचालन तथा अन्य सवारी साधनको अव्यवस्थित पार्किङका कारण सडक दुर्घटनाका घटना बढ्दै गएको हुँदा सबै पालिकाहरुले ट्राफिक प्रहरीसँग समन्वय गरी सिटी सफारीको व्यवस्थित सञ्चालन, रुट व्यवस्थापन, पार्किङ व्यवस्थापन गरी सडक दुर्घटना जोखिम न्यूनीकरण गर्ने निर्णय गरेको प्रमुख जिल्ला अधिकारी रामचन्द्र तिवारीले जानकारी दिनुभयो । आज बुधवारका दिन सुनसरी जिल्लाका प्रमुख जिल्ला अधिकारी रामचन्द्र तिवारीको अध्यक्षतामा जिल्ला विपद् व्यवस्थापन समिति तथा लागु औषध नियन्त्रणसम्बन्धी तीन महिने अभियान कार्यक्रम सञ्चालनका लागि बैठक सम्पन्न भएको हो । 

बैठकमा प्रहरी उपरीक्षक सुमनकुमार तिम्सिना, हरिनगर गाउँपालिका अध्यक्ष गफार अन्सारी, दुहबीका नगर प्रमुख वेदनारायण गच्छदार, इनरुवाका प्रमुख केदार भण्डारी, गढीका उपाध्यक्ष अनिताकुमारी साह, बर्जुका उपाध्यक्ष नितुकुमारी चौधरीसहितको उपस्थिति थियो ।