भीष्मको साङ्गीतिक चलचित्र ‘कोठा’

गोरखापत्र समाचारदाता

काठमाडौँ, मङ्सिर २० गते । साङ्गीतिक छोटो चलचित्र ‘कोठा’ सार्वजनिक गरिएको छ । काठमाडौँमा रहेको एभरेस्ट फिल्म एकेडेमीमा एक कार्यक्रमको आयोजना गरी चलचित्र सार्वजनिक गरिएको हो । आर्ट घरको निर्माणमा तयार भएको छोटो चलचित्रलाई भीष्म जोशीले तयार गर्नुभएको हो । साङ्गीतिक चलचित्रमा काठमाडौँमा डेरा गरेर भविष्य खोजिरहेका युवा र युवाको मनोविज्ञानलाई प्रस्तुत गरिएको छ । सपना पोका बोकेर काठमाडौँ छिरेको ग्रामीण ठिटो र उसका भोगाइ चलचित्रमा देख्न सकिन्छ । निर्देशक जोशीले सहरमा भविष्य खोजिरहँदा गाउँमै छुटेका अतीतहरू अनि सहरमा भेटिएका र देखिएका रहरहरूको संयोजनलाई देखाउनुभएको छ । कार्यक्रममा निर्देशक जोशीले गाउँबाट सहर आएपछिका आफ्नै भोगाइ र अनुभूतिलाई सँगालेर चलचित्र तयार गरेको बताउनुभयो ।