मलेसियामा कोटा स्थगित

गोरखापत्र समाचारदाता 

काठमाडौँ, कात्तिक २४ गते । मलेसिया सरकारले नयाँ आप्रवासी श्रमिकको कोटा स्थगित गरेको छ । मलेसिया सरकारले तत्कालका लागि नयाँ आप्रवासी श्रमिकको कोटा स्थगित गरेको मलेसियामा रहेको नेपाली दूतावासले जानकारी गराएको हो । 

दूतावासका अनुसार मलेसिया सरकारले सार्वजनिक गरेको निर्णयमा आप्रवासी श्रमिक पर्याप्त भएको र हाललाई आवश्यक नपर्ने उल्लेख छ । मलेसियामा आप्रवासी श्रमिकको सङ्ख्या २५ लाख जना तोकिएको छ । तोकिएको सङ्ख्यामा २४ लाख १० हजार आप्रवासी श्रमिक दर्ता भएर कार्यरत रहेको जनाइएको छ । 

तोकिएको सङ्ख्यामा ९० हजार श्रमिक कृषि र उत्पादनतर्फको मात्र आप्रवासी श्रमिकको कोटा बाँकी रहेका सेवा क्षेत्रबाट नयाँ श्रमिक स्थगित गरेको हो । नेपाल वैदेशिक रोजगार व्यवसायी सङ्घका अध्यक्ष राजेन्द्र भण्डारीले मलेसियाले गएको महिनादेखि नै कुनै पनि नयाँ आवेदन लिन छोडेको जानकारी दिनुभयो । उहाँका अनुसार मलेसियामा विशेष गरी कृषि, बगान, निर्माण र सेवा क्षेत्रमा माग पुनर्मूल्याङ्न गर्न तत्काल आप्रवासी श्रमिक नयाँ भर्ना स्थगित गरेको बुझिएको छ ।