कपिल ज्ञवाली
सिद्धार्थनगर, कात्तिक १६ गते । तिहार पर्वको अवसरमा बुटवलमा १४ औँ दीपावली महोत्सव सुरु भएको छ । अमरपथ व्यवसायी समिति बुटवलको आयोजनामा बुटवलको मुख्यबजार अमरपथ क्षेत्रमा तीनदिने दीपावली महोत्सव २०८१ सुरु भएको हो ।
बुटवलको खस्किँदै गएको बजारमा चहलपहल बढाउन र दिपावलीको मौलिक सांस्कृतिक जगेर्ना गर्नका लागि महोत्सव आयोजना गरिएको महोत्सव आयोजक अमरपथ टोल व्यवसायी समितिले जनाएको छ । महोत्सवको शुभारम्भ गर्दै बुटवल उपमहानगरपालिकाका प्रमुख खेलराज पाण्डेयले बुटवलको विकास सबैको साझा विषय भएको बताउँदै नगरपालिकाले सबैसँग सहकार्य गर्ने बताउनुभयो ।
उहाँले पश्चिम नेपालकै ऐतिहासिक बुटवल बजारलाई चलायमान गराउन व्यवसायीसँग मिलेर काम गर्न उपमहानगरपालिका तयार रहेको बताउनुभयो । के गर्दा व्यवसायीको संरक्षण हुन्छ र बजार चलायमान हुन्छ भन्ने योजना लिएर आउन व्यवसायीहरुलाई आग्रह गरिएको बताउनुभयो ।
चलनचल्तीमा हुँदैआएको व्यापार व्यवसायलाई आधुनिक परिवेशअनुसार परिमार्जित गरेर अगाडि बढ्न पनि उहाँले सुझाव दिनुभयो । कार्यक्रममा समितिका अध्यक्ष रामकुमार रणपालले बुटवलको खस्किँदो व्यापारलाई उठाउन बुटवलको मुख्यबजार अमरपथ क्षेत्रमा दीपावली महोत्सव आयोजना गरिएको भन्दै सहयोग र सहभागिताको लागि अनुरोध गर्नुभयो ।
खुला सीमा, पार्किङ् अभाव र घरभाडा महङ्गो हुँदा अमरपथका ब्यवसायीहरु विस्थापित हुन थालेको भन्दै उहाँले समस्या समाधानका लागि सरोकारवालाहरुलाई आग्रह गर्नुभयो । बुटवल उद्योग वाणिज्य संघका अध्यक्ष हरि अर्यालले केही समयदेखि बेलहिया नाका खुकुलो हुँदा व्यवसायीका समस्या थपिदै गएको बताउनुभयो ।
रुपन्देहीका प्रमुख जिल्ला अधिकारी बासुदेव घिमिरेले दीपावली महोत्सव मात्र नभएर देउसी भैलोलगायतका सांस्कृतिक कार्यक्रमलाई मौलिक बनाउन आग्रह गर्दै बुटवलको व्यावसायिक विकासका लागि आफुले सक्दो पहल गर्ने प्रतिवद्धता जनाउनुभयो ।
अमरपथ महोत्सव तथा टोल व्यवसायी समितिका संस्थापक अध्यक्ष राजेन्द्र ध्वजूले आर्थिक मन्दीलागायतका कारणले आफुहरु विस्थापित हुन लागेको बताउँदै यो ऐतिहासिक बजार विस्थापित हुनबाट रोक्न आग्रह गर्नुभयो ।
कला संकृतिलाई संरक्षण गर्न दिपावली महोत्सव आयोजना गरिएको पनि उहाँले बताउनुभयो । समितिका पूर्व अध्यक्ष गोकुल विश्वकर्माले १४ औँ अमरपथ दीपावली महोत्सवमा सांस्कृतिक कार्यक्रमसहित सामानमा २० प्रतिशतसम्मको छुट दिइने बताउनुभयो । कार्यक्रममा बुटवलउपमहानगर वडा ४ का अध्यक्ष नरिश्वर पौडेल, होटल ब्यवसायी रुपन्देहिका अध्यक्ष लेखनाथ भण्डारी, प्रकाशकुमार श्रेष्ठ लगायतले व्यवसायीलाइ संरक्षण गदै बजार चलायमान बनाउन सवैको सहयोग आवश्यक रहेको बताउनुभयो ।
तीन दिनसम्म सञ्चालन हुने दीपावली महोत्सव अवधिभर विशेष छुटमा सामानको विक्री वितरण, नेपाली मौलिक तथा सांस्कृति र खानाका परिकार तथा विविध सांस्कृतिक प्रस्तुति रहने आयोजकले जनाएको छ ।
