लीलाधर वली
घोराही, कात्तिक १३ गते । दाङमा टिप्परको ठक्करबाट मोटरसाइकल चालकको मृत्यु भएको छ । पूर्व–पश्चिम राजमार्गअन्तर्गत लमही–भालुवाङ सडक खण्डको राप्ती गाउँपालिका–५ दोलाईखोला पुलनजिक रा १ ख १९९८ नम्बरको टिप्परले पूर्वबाट पश्चिमतर्फ जाँदै गरेको बा ६५ प ६६३३ नम्बरको मोटरसाइकललाई ठक्कर दिँदा मोटरसाइकल चालकको मृत्यु भएको हो ।
मृत्यु हुनेमा मुगु जिल्ला स्वरूप गाउँपालिका–६ निवासी करिब २५ वर्षीय चित्रबहादुर शाही रहेको जिल्ला प्रहरी कार्यालय दाङले जनाएको छ । दुर्घटनामा गम्भीर घाइते शाहीको सिसहनियाँ स्वास्थ्य चौकीमा उपचारका क्रममा मृत्यु भएको प्रहरीले जनाएको छ ।
ठक्कर दिने टिप्पर र चालकलाई इलाका प्रहरी कार्यालय भालुवाङले निमन्त्रणा लिएर घट्नाबारे अनुसन्धान भइरहेको जिल्ला प्रहरी कार्यालय दाङका प्रहरी नायव उपरीक्षक ईश्वर थापाले जानकारी दिनुभयो । टिप्परले मंगलबार साँझ करिब पौने ५ बजेतिर ठक्कर दिएको थियो ।
