इमानसिं राना
रामपुर (पाल्पा), कात्तिक १३ गते । जिल्लाको रम्भा गाउँपालिका –३, मा ट्रक अनियन्त्रित भई अर्को ट्रकलाई ठक्कर दिँदा चालकको मृत्यु भएको छ । ठक्कर दिने ट्रक चालक रम्भा गाउँपालिका –३ पाल्पाका २३ वर्षीय भुवनसिंह रानाको मृत्यु भएको प्रहरीले जनाएको छ ।
सोमबार राति १०ः५० को समयमा बुटवलबाट पोखरातर्फ जाँदै गरेको लु १ ख ९३५१ नम्बरको ट्रकले ब्रेक फेल भई सोही दिशातर्फ जाँदै गरेको ना १ क ७१२१ नम्बरको ट्रकलाई सिद्धार्थ राजमार्गअन्तर्गत अगाहाखोलामा पछाडिबाट ठक्कर दिँदा लु १ ख ९३५१ नम्बरको ट्रक चालक राना घाइते हुनुभएको थियो ।
प्रहरी चौकी राम्दी र जिल्ला प्रहरी कार्यालय पाल्पाबाट गएको ट्राफिक प्रहरीसहितको टोलीले चालकलाई उद्धार गरी उपचारको लागि लुम्बिनी मेडिकल कलेज प्रभासमा पठाएको थियो । चालकको उपचारको क्रममा मृत्यु भएको जिल्ला प्रहरी कार्यालय पाल्पाका प्रहरी नायव उपरीक्षक सुनिल मल्लले जानकारी दिनुभयो ।
दुर्घटनामा ना १ क ७१२१ नम्बरको ट्रकको सह–चालक वालिङ नगरपालिका –१० स्याङ्जाका २१ वर्षीय सन्जित खवास थापा घाइते हुनुभएको छ । घाइते थापाको अवस्था सामान्य रहेको प्रहरी उपरीक्षक मल्लले जानकारी दिनुभयो । उहाँका अनुसार ना १ क ७१२१ नम्बरको ट्रक चालक वालिङ नगरपालिका –९ बस्ने बर्ष ५६ को गुप्तबहादुर गुरुङ सकुशल रहेको छन् । दुर्घटनाको विषयमा थप अनुसन्धान भइरहेको प्रहरीले जनाको छ ।
