राममणि दाहाल
हेटौँडा, भदौ २४ गते । हेटौँडा उपमहानगरपालिका १७ स्थित कठायत चोकमा मोटरसाइकल दुर्घटनामा परी घाइते भएका एक युवको मृत्यु भएको छ ।
धरान चतरा सडक खण्डमा पर्ने सो स्थानमा ना ६४ प २७१० नम्बरको मोटरसाइकल दुर्घटना हुँदा घाइते भएका मकवानपुरको बकैया गाउँपालिका ४ का उत्तम गौतमको उपचारको क्रममा मृत्यु भएको जिल्ला प्रहरी कार्यालय मकवानपुरका प्रहरी नायब उपरीक्षक लक्ष्मी भण्डारीले जानकारी दिनुभयो ।
गत शुक्रबार राती हेटौँडा बजारबाट ठुलोदमारतर्फ जाँदै गरेको उक्त मोटरसाइकल सडकमा बाटो क्रस गर्न खोज्ने कुकुरलाई बचाउने क्रममा अचानक ब्रेक लगाई आफैँ अनियन्त्रित भई दुर्घटना भएको प्रहरीले जनाएको छ ।
दुर्घटनामा मोटरसाइकल चालक मकवानपुर बकैया गाउँपालिका ४ का ४४ का प्रभाव गौतम सामान्य घाइते भएको र साेही मोटरसाइकल पछाडि सवार ४६ वर्षीय उत्तम गौतमको नाक र टाउकोमा चोट लागेको थियो । हेटौँडा अस्पतालमा सामान्य उपचारपछि गम्भीर घाइते हुनुभएका उत्तम गौतमलाई पुरानो मेडिकल कलेज भरतपुर चितवनमा लगिएको थियो ।
त्यहाँ उहाँको उपचार सम्भव नहुने भनी फिर्ता गरी चुरेहिल अस्पताल हेटौँडा ल्याएकोमा उपचारको क्रममा आइतबार राती ९ः२० बजे चिकित्सकले मृत घोषणा गरेको जिल्ला प्रहरी कार्यालय मकवानपुरले जनाएको छ । मोटरसाइकल अस्थायी प्रहरी पोष्ट हटियाको नियन्त्रणमा छ ।
