बाजुरा समाचारदाता
बाजुरा, असार ४ गते । बाजुराका बाढीपहिरोपीडितलाई बर्खा लागेसँगै घरबासको चिन्ता हुन थालेको छ । दुई वर्षअघि जेठमा आएको बाढीपहिरोबाट पीडित व्यक्ति अझै घरबासको चिन्ता गरिरहेका छन् । यस जिल्लाका अधिकांश गाउँबस्ती बाढीपहिरोको उच्च जोखिममा परेको कुरा विभिन्न अध्ययनले देखाएको छ ।
जोखिममा परेका ती बस्ती अहिले कतै स्थानान्तरण नहुँदा यहाँका स्थानीयलाई बर्खाको समयमा घरबासकै चिन्ता हुन थालेको हो । हिउँदमा बाढीपहिरोको खासै डर नहुने हुँदा जोखिमयुक्त ठाउँमा बसोबास गर्दै आए पनि बर्खामा पहिरोले घर नै बगाउँछ कि भन्ने मनमा चिन्ता लाग्न थालेको स्वामीकार्तिक गाउँपालिका–२, मुक्तिकोटका स्थानीय नरे लुहारले बताउनुभयो ।
उहाँले भन्नुभयो, “गत वर्ष आएको बाढीपहिरोले पूरै गाउँबस्ती जोखिममा परे पनि यहाँका स्थानीयलाई बसोबास गर्न अन्त कतै ठाउँ नभएपछि बाध्यताले यसैमा बसोबास गर्नु परेको छ ।” गत मङ्सिर ३० गते बस्ती स्थानान्तरणका लागि अनुगमन गर्न जिल्लाबाट सरकारी टोली गाउँमा पुगे पनि अहिलेसम्म यो बस्ती कतै स्थानान्तरण नभएको लुहारले बताउनुभयो ।
बाजुराको बुढीनन्दा, त्रिवेणी, गौमूल, बडीमालिका, बुढीगङ्गा, खप्तडछेडेदह गाउँपालिकाका अधिकांश गाउँबस्ती पनि बाढीपहिरोको उच्च जोखिममा रहेका छन् । बाजुराको तल्लो क्षेत्रमा रहेको खप्तडछेडेदह गाउँपालिका–५ को पारतोला गुइवन बस्ती पहिरोको जोखिममा रहेको झन्डै २५ वर्ष हुन पुग्यो । २०५६ सालदेखि सो बस्तीका झन्डै सयौँ घरपरिवार बाढीपहिरोको जोखिममा रहँदै आए पनि अहिले कतै स्थानान्तरण गरिएको छैन ।
बस्ती स्थानान्तरणको विषयलाई मुख्य एजेन्डा बनाएर विजयी भएका जनप्रतिनिधि जितेपछि फर्केर गाउँघरतर्फ नआउने गरेको स्थानीय दीपा रावतले बताउनुभयो । उहाँले भन्नुभयो, “हामी भने अहिलेसम्म कतै गएका छैनौँ । जाऊँ पनि कसरी ? कहीँकतै ठाउँमा हाम्रो पहुँच छैन । अन्य ठाउँमा जग्गा लिएर बसोबास गरौँ भने पैसा छैन । अरू केही विकल्प नभएपछि यतै बस्नु परेको छ ।”
बुढीगङ्गा नगरपालिकाका बजेडी, निमनी, ताँप्रीसेरा, अम्कोट र बडीमालिका नगरपालिकाका घाँगर, ओलेना, तिपाडा, मना र कोर्धलगायतका बस्तीको अवस्था पनि उस्तै रहेको छ । गत वर्षको बर्खामा गाउँमाथिको वनमा त्रिपाल टाँगेर बसेका यहाँका अधिकांश बासिन्दा यो बर्खामा पनि पोहोरको नियति भोग्नुपर्ने हो कि भन्ने चिन्तामा छन् ।
स्थानीय तहले यहाँका बाढीपहिरोबाट प्रभावित भएका बस्तीको तथ्याङ्क सङ्कलन गरेर जिल्ला विपत् व्यवस्थापन समितिमा पठाइसकेको छ । बाजुराका प्रमुख जिल्ला अधिकारी भीमकान्त पौड्यालले बाढीपहिरोबाट विस्थापित भएका घरपरिवारलाई पुनस्र्थापना गर्नका लागि तथ्याङ्क सङ्कलन गरेर गृह मन्त्रालयमा पठाएको जानकारी दिनुभयो । उहाँले भन्नुभयो, “बाढीपहिरोको जोखिममा रहेका बस्तीको अवस्था निकै दयनीय छ । चाँडोभन्दा चाँडो समस्या समाधान गर्न पाए हुन्थ्यो ।”
