बागलुङबाट माओवादी केन्द्रका देवेन्द्र पौडेल विजयी
बागलुङ क्षेत्र नम्बर २ बाट (माओवादी केन्द्र)का सचिव तथा शिक्षामन्त्री देवेन्द्र पौडेल विजयी हुनुभएको छ। पौडेल २४ हजार ७७९ मत प्राप्त गर्नुभयो।
राष्ट्रिय जनमोर्चाका अध्यक्ष चित्रबहादुर केसी निर्वाचित
राष्ट्रिय जनमोर्चाले बागलुङबाट प्रतिनिधिसभा सदस्यमा जितको सुरुवात गरेको छ । जनमोर्चाका केन्द्रीय अध्यक्ष चित्रबहादुर केसी बागलुङ निर्वाचन क्षेत्र नं १ बाट प्रतिनिधिसभा सदस्यमा निर्वाचित हुनुभएको हो ।
गण्डकी प्रदेशका ३६ क्षेत्रमध्ये हालसम्म १५ निर्वाचन क्षेत्रमा टुङ्गो
प्रतिनिधिसभा तथा प्रदेशसभा अन्तर्गतमा मङ्सिर ४ गते भएको निर्वाचनको परिणाम तीव्र गतिमा आउन थालेको छ । गण्डकी प्रदेशको १८ संघीय निर्वाचन क्षेत्रमध्ये मुस्ताङ, मनाङ र तनहुँ –२ को नतिजा कांग्रेसको पक्षमा आइसकेको छ भने अन्य स्थानको मतगणना अन्तिम स्थानमा पुगेको छ ।
कास्की प्रदेश सभा २ (क) मा एमालेका कार्की विजयी
कास्की क्षेत्र नम्बर २ प्रदेश सभा (क) मा नेकपा (एमाले) का उम्मेदवार विजयी हुनुभएको छ । राष्ट्रिय प्रजातन्त्र पार्टीका उम्मेदवारलाई पराजित गर्दै एमालेका भीमबहादुर कार्की प्रदेश सभा सदस्यमा निर्वाचित हुनुभएको हो । विजयी कार्कीले १० हजार ५३१ मत प्राप्त गर्नुभयो ।
मुगुमा मतगणना सुरु
निर्वाचन सम्पन्न भएको दुई दिनपछि मुगुमा मतगणना सुरु भएको छ । सबै मतदानस्थलबाट मतपेटिका आइसकेपछि बुधबार बिहानबाट मतगणना सुरु भएको हो ।
नवलपरासी (बर्दघाट सुस्ता पूर्व)–२ को दुवै प्रदेशमा एमाले विजयी
नवलपरासी (बर्दघाट सुस्ता पूर्व)–२ को प्रदेशसभा (क)मा नेकपा (एमाले)का पदमा जिसी श्रेष्ठ विजयी हुनुभएको छ । श्रेष्ठले १९ हजार ३९६ मत पाउनुभएको छ । उहाँका प्रतिद्वन्द्वी नेकपा (माओवादी केन्द्र)का सौगमकुमार सिरपालीले १४ हजार ७५८ मत ल्याउनुभएको छ ।
तनहुँ २ (क) मा एमालेका महत विजयी
तनहुँ निर्वाचन क्षेत्र नम्बर २ प्रदेशसभा (क) मा नेकपा (एमाले) का श्यामराजा महत निर्वाचित हुनुभएको छ ।
तनहुँ २ प्रदेशसभा (ख) मा कांग्रेसका आले विजयी
तनहुँ–२ को प्रदेशसभा निर्वाचन क्षेत्र २ (ख) मा नेपाली कांग्रेसका जिल्ला सभापति जीतप्रकाश आले विजयी हुनुभएको छ ।
लमजुङमा देव र पृथ्वीसुब्बा गुरुङबीच कडा प्रतिस्पर्धा
प्रतिनिधि सभा तथा प्रदेश सभा सदस्य निर्वाचन २०७९ को मतगणनामा प्रतिनिधि सभातर्फ नेकपा एमालेका पृथ्वीसुब्बा गुरुङ र नेकपा माओवादी केन्द्रमा देवप्रसाद गुरुङबीच कडा प्रतिस्पर्धा भइरहेको छ ।
बागलुङ प्रदेश सभामा कांग्रेसका थापा विजयी
ढोरपाटन, मङ्सिर ७ गते । बागलुङ क्षेत्र नं.–१ (क) मा नेपाली कांग्रेसका दीपेन्द्रबहादुर थापा विजयी हुनुभएको छ । थापाले नेकपा (एमाले) का उम्मेदवार हीराबहादुर केसीलाई एक हजार चार सय ७८ मतान्तरले पराजित गर्नुभएको हो । थापाले १३ हजार आठ सय ८४ मत ल्याउँदा केसीले १२ हजार चार सय पाँच मत प्राप्त गर्नुभएको छ । थापा पाँचदलीय गठबन्धनका साझा उम्मेदवार हुनुहुन्थ्यो । यस क्षेत्रमा थापा र केसीसहित पाँचजनाको उम्मेदवारी परेको थियो । राष्ट्रिय प्रजातन्त्र पार्टीका डिल्लीप्रसाद आचार्य एक हजार चार सय ५०, सामाजिक एकता पार्टीका भक्तबहादुर विक तीन सय सात र स्वतन्त्र उम्मेदवार दीपेन्द्र हमालले एक सय सात मत प्राप्त गर्नुभएको छ ।बागलुङ नगरपालिकाका ११ वडा र काठेखोला गाउँपालिका पर्ने यस क्षेत्रमा ५० हजार दुई सय ८० मतदाता रहेकामा २८ हजार आठ सय २५ मत खसेको थियो । जसमा छ सय ३२ मत बदर भएको छ । रासस
बागलुङ–२ (क) मा कांग्रेसका शेरचन विजयी
बागलुङ क्षेत्र नं. –२ (क) मा नेपाली कांग्रेसका जितबहादुर शेरचन विजयी हुनुभएको छ ।
ललितपुर–१ मा कांग्रेसका उदयशम्शेर विजयी
ललितपुर–१ बाट प्रतिनिधिसभामा नेपाली कांग्रेसका उम्मेदवार उदयशम्शेर राणाले जित हासिल गर्नुभएको छ ।
स्याङ्जा २ मा सुरु भएन मतगणना, कांग्रेस–एमाले धर्नामा
स्याङ्जा क्षेत्र नं. २ को मतगणना मङ्गलबार अबेरसम्म सुरु हुन सकेको छैन । चार बुथमा धाँधली गरी बुथ कव्जा भएको नेकपा (एमाले) ले आरोप लगाउँदै पुनः मतदानको माग गरेको छ । कांग्रेसले तत्काल मतगणनाको माग गर्दै धर्ना बसेको छ ।
म्याग्दीमा कांग्रेसको ८ सय मतको अग्रता
म्याग्दीमा जारी मतगणनाअनुसार मङ्गलबार दिउँसो साढे ३ बजेसम्म नेपाली कांग्रेसका खमबहादुर गर्बुजाले अग्रता कायम राख्नुभएको छ । प्रदेश निर्वाचन क्षेत्र नं. २ को धवलागिरि र मालिका गाउँपालिकाको मतगणना सकिँदा गठबन्धनका साझा उम्मेदवार गर्बुजाले ६ हजार तीनसय ७० मत ल्याउनुभएको छ ।
स्याङ्जा क्षेत्र नं. १ मा अग्रता बढाउँदै कांग्रेसका थापा
मङ्सिर ४ गते भएको निर्वाचनको मतगणनामा स्याङ्जा क्षेत्र नं. १ मा नेपाली काग्रेसका उम्मेदवार राजु थापाले अग्रता बढाउँदै जानु भएको छ ।
एमाले उम्मेदवार राना कांग्रेस नेता पौडेलभन्दा अगाडि
तनहुँ –१ को प्रतिनिधि सभा सदस्यमा नेकपा (एमाले) का उम्मेदवार एकबहादुर रानाले नेपाली कांग्रेसका वरिष्ठ नेता रामचन्द्र पौडेललाई पछाडि पार्नुभएको छ ।
पूर्वी नवलपरासी क्षेत्र १ र २ मा कांग्रेसको अग्रता
प्रतिनिधिसभा तथा प्रदेशसभा निर्वाचनअन्तर्गत पूर्वी नवलपरासीमा क्षेत्र नं १ र २ मा गठबन्धनबाट नेपाली कांग्रेसको अग्रता कायम छ । क्षेत्र नं १ मा नेपाली कांग्रेसका डा. शशाकंले छ हजार १३५ ल्याउँदा नेकपा एमालेका उम्मेदवार कृष्ण पौडेलले चार हजार ४४४ मत ल्याउनुभएको छ । दुई उम्मेदवारबीचको मतान्तर एक हजार ६८९ रहेको छ ।
तनहुँको दुवै निर्वाचन क्षेत्रमा कांग्रेस उम्मेदवारको अग्रता
तनहुँको दुई वटै निर्वाचन क्षेत्रमा नेपाली कांग्रेसले अग्रता लिएको छ । प्रतिनिधि सभा सदस्यमा क्षेत्र नम्बर १ मा झिनो मतान्तरले अग्रता लिएको छ भने क्षेत्र नम्बर २ मा फराकिलो मतान्तरले अगाडि छ ।
गाेरखा २ मा प्रचण्डकाे अग्रता, निकटतमभन्दा पाँचहजार १२८ मत बढी
प्रतिनिधिसभा सदस्यकाे लागि भएकाे निर्वाचनमा गाेरखा २ मा नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले सात हजार ५७ मतसहित प्राप्त गर्नुभएकाे छ ।
म्याग्दीमा मतगणना पुन : सुरु
म्याग्दीमा मतगणना पुन : सुरु गरिएको छ । मतदान अधिकृतले हस्ताक्षर नगरेका मतपत्र फेला परेपछि स्थगित भएको मतगणना फेरी सुरु भएको मुख्य निर्वाचन अधिकृतको कार्यालयले जानकारी दिनुभयो ।
स्थगन भएका मतदानस्थलमा आज पुनः मतदान हुँदै
यही मङ्सिर ४ गते सम्पन्न प्रतिनिधिसभा तथा प्रदेशसभा सदस्य निर्वाचनमा राजनीतिक विवादका कारण स्थगन मतदानस्थलमा आज पुन मतदान भइरहेको छ ।
स्याङ्जामा कांग्रेसको अग्रता
स्याङ्जा क्षेत्र नम्बर १ मा नेपाली कांग्रेसका उम्मेदवार राजु थापाले झिनो मतान्तरले अग्रता लिनुभएको छ । पाँच हजार ६३३ मत गणना हुँदा थापाले दुई हजार ४५५ मत हात पार्नुभएको छ भने नेकपा एमालेका नारायण मरासिनीले दुई हजार २५५ मत हात प्राप्त गर्नुभएको हो ।
म्याग्दीमा मतगणना स्थगित
म्याग्दीमा मतदान अधिकृतले हस्ताक्षर नगरेका मतपत्र फेला परेपछि मतगणना स्थगित भएको छ । मालिका गाउँपालिका ५ देवस्थान केन्द्रको मतगणनाका क्रममा प्रतिनिधिसभा तर्फका एकसय २ मतपत्रमा मतदान अधिकृतको हस्ताक्षर नभएको फेला परेको हो ।
पर्वतमा मतगणना जारी, कांग्रेसको अग्रता
प्रतिनिधि सभा तथा प्रदेश सभा निर्वाचनअन्तर्गत पर्वतको मतगणनामा जारी छ । पछिल्लो मतपरिणाम अनुसार गठबन्धनबाट उम्मेदवार बनेका नेपाली कांग्रेसका अर्जुन प्रसाद जोशीको अग्रता रहेको छ ।
लमजुङमा एमालेको अग्रता
लमजुङमा प्रतिनिधि सभा सदस्यमा नेकपा एमालेका पृथ्वीसुब्बा गुरुङकै अग्रता कायम छ । १७ हजार ९ सय २८ मतगणना गर्दा एमालेका गुरुङले ९ हजार १ सय ९ मत ल्याएका छन् । सत्ता गठबन्धनका उम्मेदवार नेकपा (माओवादी) केन्द्रका देवप्रसाद गुरुङले ७ हजार २०० मत पाएका छन् ।
