• गोरखापत्र अनलाइन
• २५ जेठ २०८१, शुक्रबार

बढेको महसुल फिर्ता गराउन पालिका सक्रिय

बुटवल पावर कम्पनी (बिपिसी) को आँधीखोला वितरण केन्द्रको विद्युत् महसुलमा वृद्धि भएसँगै स्याङ्जा तथा पाल्पामा विरोध तीव्र भएको छ । विद्युत् महसुल वृद्धि गरिएसँगै प्रभावित क्षेत्रका पालिकाले पनि सक्रियता देखाएका छन् । आआफ्ना नागरिक प्रत्यक्ष मारमा पर्ने भन्दै महसुल फिर्ता गर्न पालिकाले दबाब दिएका हुन् । प्रभावित क्षेत्रका जनप्रतिनिधि वालिङमा भेला भएर महसुल फिर्ता गराउने प्रतिबद्धता जनाएका हुन् । कार्यक्रममा चापाकोटका नगरप्रमुख देवबहादुर खाण (ईश्वर) ले कम गुणस्तरको विद्युत् वितरण गर्दै आएको बिपिसीले अस्वाभाविक रूपमा महसुल वृद्धि गरेको भन्दै यो निर्णय मान्य नहुने बताउनुभयो । प्रभावित क्षेत्रका स्थानीय सरकार, उपभोक्ता, राजनीतिक दल एकताबद्ध भएर अगाडि बढ्नुपर्नेमा उहाँको जोड छ । बिजुलीको गुणस्तर कम हुँदा पालिकाका कामसमेत प्रभावित भइरहेको भन्दै यो मूल्य वृद्धि स्वीकार्य नहुने स्पष्ट पार्नुभयो ।