माओवादी केन्द्रीय समितिकाे बैठक बिहीबारसम्मका लागि स्थगित
नेकपा (माओवादी केन्द्र)को केन्द्रीय समितिकाे बैठक बिहीबारसम्मका लागि स्थगित भएको छ । पार्टी अध्यक्षसहित शीर्षनेता संसद् बैठकमा सहभागी हुनुपर्ने भएपछि बुधबारका लागि तोकिएको बैठक बिहीबारसम्मका लागि स्थगित भएको अध्यक्ष पुष्पकमल दाहाल 'प्रचण्ड'का स्वकीय सचिव रमेश मल्लले जानकारी दिनुभयो ।
अर्थमन्त्रीको विषयमा संसदीय छानबिन समिति गठन होस् : उपसभापति खड्का
नेपाली काँग्रेसका उपसभापति पूर्णबहादुर खड्काले बजेट निर्माणको क्रममा अनधिकृत व्यक्तिलाई अर्थ मन्त्रालयमा प्रवेश गराएको विषयमा छानबिन गर्न संसदीय छानबिन समितिको गठन हुनुपर्ने बताउनु भएको छ ।
जसपाका अध्यक्षद्वय यादव र भट्टराईले छुट्टा-छुट्टै भेला गर्दै
काठमाडौं, असार २१ गते। सत्ता साझेदार दल जनता समाजवादी पार्टी, नेपालका अध्यक्ष उपेन्द्र यादवको नेतृत्वमा वीरगञ्जमा असार २९ र ३० गते केन्द्रीय समिति बैठक बस्दैछ। यसअघि जसपाले असार २८ र २९ गते केन्द्रीय समितिको बैठक बोलाए पनि सो दिन मुस्लिम समुदायको वकर–ईद (कुर्वानी) परेकोले बैठकको मिति सारिएको केन्द्रीय कार्यालयका सचिव प्रकाश अधिकारी मंगलबार प्रेस विज्ञप्तिमार्फत जानकारी दिनुभएको छ। यसैबीच, जसपा संघीय परिषद् अध्यक्ष डा. बाबुराम भट्टराईले असार २९ र ३० गते काठमाडौंमा छुट्टै भेला आयोजना गर्दै हुनुहुन्छ। यसअघि अध्यक्षद्वय यादव र भट्टराईबीच अलग हुने समझदारी भएको थियो। पूर्वमन्त्रीसमेत रहनुभएका जसपाका उपाध्यक्ष रेणुकुमारी यादवले वीरगञ्जको केन्द्रीय समितिको बैठकबारे थाहा भए पनि भट्टराई पक्षको भेला बारे जानकारी नभएको बताउनुभयो। यस विषयमा बोल्नुहुँदै उहाँले भन्नुभयो, “अब त्यो थाहा भएन, बाबुरामजी के गर्दै हुनुहुन्छ। शीर्ष नेताबीच के छलफल भएको छ, त्यो नेतालाई नै थाहा होला, मलाई बढी थाहा भएन।”जसपा महासचिव नरध्वज लिम्बुले भने पार्टीमा देखिएको समस्या बुद्धिमतापूर्वक ढंगले समाधान गर्ने पक्षमा आफूहरु रहेको बताउनुभयो। “बुद्धिमतापूर्ण ढंगले, अपमान गर्ने हिसाबले होइन। मान, मनितोका साथ समाधान गर्ने पक्षमा हामी छौं। छुट्टै भेला बोलाउनुभएको भन्ने पनि छ, वार पारको कुरा पनि नगरौं होला”, अध्यक्ष भट्टराईमा अलि बढ्ता महत्वकांक्षा देखिएको उहाँको भनाइ छ।अध्यक्ष भट्टराईले आफू पक्षमा पार्टीका सदस्यको हस्ताक्षर संकलन गर्नुभएको छ। तर, उहाँको पक्षमा २५ देखि ३० प्रतिशत मत पनि नजुट्ने दाबी यादव पक्षका नेताको छ। नयाँ पार्टी गठनका लागि संसदीय समिति र पार्टीमा ४० प्रतिशत आवश्यक हुनाले भट्टराईद्वारा नयाँ पार्टी गठन हुने विषय प्रष्ट हुन सकेको छैन। अध्यक्ष यादवका प्रेस संयोजक याम चौरासियाका अनुसार वीरगञ्जको बैठकमा अध्यक्ष भट्टराई पक्ष नजाने पक्का भएको छ। त्यही समय अध्यक्ष भट्टराईले अर्को बैठक काठमाडौंमा राख्नुभएको उहाँ बताउनुहुन्छ। उता, जसपाका अर्का महासचिव गंगानारायण श्रेष्ठले अध्यक्ष भट्टराईले असार २९ र ३० गते काठमाडौंमा भेलाको आह्वान गर्नुभएको जानकारी दिनुभयो। “त्यो केन्द्रीय समितिको विस्तारित बैठकले पार्टीभित्रको समस्याबारे छलफल, बहस गरेर आवश्यक निर्णय गर्छ”, उहाँले भन्नुभयो। अध्यक्ष भट्टराईले व्यक्तिगतरुपमा पार्टी घोषणा गर्ने कुरा नहुने बताउनुहुँदै श्रेष्ठले भेलामा हजारभन्दा बढी नेता सहभागी हुने दाबी गर्नुभयो। लोकतन्त्रको प्रयोग गरेर नेताले विचार राखेपछि त्यसको आधारमा आवश्यक निर्णय हुने उहाँको भनाइ छ। काठमाडौंको कुन स्थानमा भेला गर्ने भन्नेबारे निश्चित भइनसकेको उहाँको भनाइ छ।
कांग्रेस पदाधिकारी बैठक : निर्वाचन कानुन परिमार्जन सम्बन्धमा छलफल
सत्ता साझेदार दल नेपाली कांग्रेसको मंगलबारको पदाधिकारी बैठकमा निर्वाचनको कानुन परमार्जन एवम् परिस्कृत गर्ने सम्बन्धनमा छलफल भएको छ।
माओवादी केन्द्रीय कार्यालय बैठकः सांगठानिक प्रस्तावको जिम्मा अध्यक्षलाई
काठमाडौं, असार २१ गते। सत्ता साझेदार दल नेकपा (माओवादी केन्द्र) को सांगठानिक प्रस्तावको जिम्मा पार्टी अध्यक्ष पुष्पकमल दाहाललाई दिइएको छ। मंगलबार खुमलटारमा बसेको पार्टीको केन्द्रीय कार्यालय बैठकले सो निर्णय गरेको अध्यक्ष दाहालका प्रेस संयोजक सूर्यकिरण शर्माले जानकारी दिनुभयो। माओवादी केन्द्रको आज पनि बस्ने भनिएको केन्द्रीय समितिको बैठक स्थगितपछि नेताहरु केन्द्रीय कार्यालयको बैठकमा जुट्नुभएको थियो। “पार्टीको केन्द्रीय समितिको बैठक चलिरहेको छ, पोलिट्ब्यूरो, स्थायी समिति र पदाधिकारीको विषयमा सम्पूर्ण जिम्मा अध्यक्षलाई दिएर संगठनात्मक प्रस्ताव तयार गर्ने निर्णय भयो”, उहाँले भन्नुभयो। यहाँले केन्द्रीय कार्यालयका सबै सदस्यको सुझावका आधारमा अध्यक्ष दाहालले सो प्रस्ताव तयार गर्नुहुने बताउनुभयो। शर्माका अनुसार अर्थमन्त्री जनार्दन शर्माको विषयमा प्रतिनिधिसभा संसदमा प्रतिपक्षी दलले आवाज उठाए पनि त्यसतर्फ आजको बैठकमा कुनै ठोस छलफल भएन। उहाँले भन्नुभयो, “त्यो विषय प्रतिपक्षीले उठाएका हुन्, त्यसमा छलफल भएन, ठोस प्स्ताव तयार गर्ने जिम्मा अध्यक्ष प्रचण्डलाई दिइएको हो।”
संवेदनशीलता हेरेर उपत्यकाको सुरक्षा संघीय प्रहरीलाई दिने तयारी भयो : गृहमन्त्री खाण
गृहमन्त्री बालकृष्ण खाणले बढ्दो सुरक्षा संवेदनशीलतालाई ध्यानमा राखेर सरकारले काठमाडौं उपत्यकाको सुरक्षाको जिम्मा संघीय प्रहरीलाई दिने तयारी गर्नुपरेको बताउनुभएको छ।
गठबन्धन टुटे देश दुर्घटनामा जान्छ : कांग्रेस उपसभापति गुरुङ (भिडियोसहित )
नेपाली कांग्रेसका उपसभापति धनराज गुरुङले गठबन्धन टुटे देश दुर्घटनातर्फ जाने दाबी गुर्नुभएको छ । मङ्गलबार काठमाडौंमा नेपाल ट्रेड युनियन कांग्रेसले आयोजना गरेको स्व.नेता गिरिजाप्रसाद कोइरालाको शालिक अनावरण कार्यक्रममा बोल्नुहुँदै उहाँले यस्तो बताउनुभएको हो ।
सिंहदरबारमा मन्त्रिपरिषद् बैठक बस्दै
प्रधानमन्त्री शेरबहादुर देउवाले मन्त्रिपरिषद् बैठक बोलाउनुभएको छ । प्रधानमन्त्री देउवाका प्रेस प्रमुख गोविन्द परियारले मङ्गलबार दिउँसो ३ बजे सिंहदरबारस्थित प्रधानमन्त्रीको कार्यालयमा बैठक बस्न लागेको जानकारी दिनुभयो ।
प्रजातान्त्रिक आन्दोलनमा गिरिजाप्रसादको योगदान अतुलनीय: प्रम देउवा
प्रधानमन्त्री एवम् नेपाली कांग्रेस सभापति शेरबहादुर देउवाले प्रजातान्त्र पुनःस्थापनमा स्वर्गीय गिरिजाप्रसाद कोइरालाको योगदान अतुलनीय रहेको बताउनुभएको छ । काठमाडौंमा कोइरालाको शालिक अनावरण गर्नुहुँदै प्रधानमन्त्री देउवाले २००७ सालको प्रजातान्त्रिक आन्दोलनमा उहाँको महत्त्वपूर्ण योगदान रहेको बताउनुभएको हो ।
माओवादीको केन्द्रीय समिति बैठक बुधबारसम्म स्थगित
सत्ता साझेदार दल नेकपा (माओवादी केन्द्र) को केन्द्रीय समितिको बैठक स्थगित भएको छ । नेताहरुले थप होमवर्क गर्नुपर्ने भएकोले बैठक बुधबार दिउँसो १ बजे सरेको केन्द्रीय सदस्य जयपुरी घर्तीले जानकारी दिनुभयो ।
माओवादीको केन्द्रीय समिति बैठक : केन्द्रीय सदस्यहरुको धारणा राख्ने क्रम सकियो
सत्ता साझेदार दल नेकपा (माओवादी केन्द्र) को केन्द्रीय समितिको बैठक जारी रहेको छ । जारी बैठकमा सोमबार केन्द्रीय सदस्यहरुले आफ्नो धारणा राख्ने क्रम सकिएको छ ।
सीसीटीभी फुटेज डिलिट गर्नु अपराध हो : उपमहासचिव ज्ञवाली
प्रमुख प्रतिपक्षी दल नेकपा (एमाले) का उपमहासचिव प्रदीपकुमार ज्ञवालीले बजेट निर्माणबेलाको सीसीटिभी फुटेज डिलिट गरेर अर्थमन्त्री जनार्दन शर्माले आर्थिक चलखेल गरेको आरोप लगाउनुभएको छ । बजेट बनाउने बेलामा अनधिकृत व्यक्तिको प्रवेश गराएकाले सरकारले त्यसको छानविन गर्नुपर्ने उहाँले बताउनुभयो । सीसीटिभी फुटेज डिलिट गराएर अर्थमन्त्रीले जघन्य अपराध गरेको उपमहासचिव ज्ञवालीको भनाइ छ ।
अर्थमन्त्रीले राजिनामा दिएर छानबिनमा सहयोग गर्नुपर्छ : महामन्त्री थापा
नेपाली कांग्रेसका महामन्त्री तथा सांसद गगनकुमार थापाले अर्थमन्त्री जनार्दन शर्माले पदबाट राजीनामा दिनुपर्ने बताउनुभएको छ । सोमवार प्रतिनिधि सभा बैठकपछि सञ्चारकर्मीलाई प्रतिक्रिया दिदैँ महामन्त्री थापाले अर्थमन्त्री शर्माले पदबाट राजीनामा दिएर छानविनमा सहयोग गर्नुपर्ने बताउनुभएको हो ।
ललिता प्रकरणमा सरकारले चासो दिएन : सांसद सुवाल
नेपाल मजदुर किसान पार्टीका सांसद प्रेम सुवालले ललिता निवासको जग्गा प्रकरणमा सरकारले चासो नदिएको गुनासो गर्नुभएको छ । सोमवार राज्य व्यवस्था तथा सुशासन समितिको बैठकमा बोल्दै उहाँले सो गुनासो गर्नुभयो ।
राष्ट्रपतिसमक्ष नवनियुक्त तीन मन्त्रीको शपथ
राष्ट्रपतिसमक्ष शपथ लिने मन्त्रीहरूमा भौतिक पूर्वाधार तथा यातायात मन्त्री मोहम्मद इस्तियाक राई, कृषि तथा पशुपन्छी विकास मन्त्री मृगेन्द्र सिंह र वन तथा वातावरण मन्त्री प्रदीप यादव हुनुहुन्छ ।
माओवादीको केन्द्रीय समिति बैठक जारी
सोमबारको बैठकमा अध्यक्ष पुष्पकमल दाहालले पेश गर्नुभएको १० पृष्ठको सङ्क्षिप्त प्रतिवेदनमाथि छलफल भइरहेको छ ।
एसपीपी सहमति मैले गरेको होइन : अध्यक्ष ओली
नेकपा (एमाले) का अध्यक्ष तथा संसदीय दलका नेता केपी शर्मा ओलीले स्टेट पार्टनरसिप प्रोग्राम (एसपीपी) आफू प्रधानमन्त्री भएकाबेला नपठाइएको बताउनुभएको छ । आफूले पठाएको कुनै प्रमाण भए पेश गर्न उहाँले सत्ता गठबन्धनका नेताहरुलाई चुनौति दिनुभयो ।
कांग्रेस पदाधिकारी बैठक मंगलबार
नेपाली कांग्रेसले समसामयिक राजनीतिक विषयमा छलफल गर्न पार्टीको पदाधिकारी बैठक यही असार २१ गते बोलाएको छ ।
प्रशिक्षणका लागि सातै प्रदेशमा खटिए एमाले नेताहरु
नेकपा (एमाले) ले स्थानीय तह निर्वाचनको समीक्षा र सातै प्रदेशमा प्रशिक्षण कार्यक्रम सञ्चालनका लागि पार्टीका नेताहरुलाई जिम्मेवारी तोकेको छ ।
विश्वका समस्या हल गर्न समान धारणा बन्यो : सभामुख सापकोटा
काठमाडौं, असार १९ गते। संघीय संसद, प्रतिनिधि सभाका सभामुख अग्निप्रसाद सापकोटाले असंलग्नताको सिद्धान्तले मात्रै वर्तमान विश्वका समस्या हल गर्न सक्ने विषयमा असंलग्न राष्ट्रका बीचमा समान धारणा बनेको बताउनु भएको छ।अजरबैजानको राजधानी बाकुमा सम्पन्न ‘असंलग्न आन्दोलनको संसदीय सञ्जाल’को सम्मेलनमा सहभागी भएर आइतबार साँझ स्वदेश फर्किएपछि त्रिभुवन अन्तराष्ट्रिय विमानस्थलमा पत्रकारसँग कुरा गर्दै सभामुख सापकोटाले यस्तो बताउनुभएको हो। उहाँले संयुक्त राष्ट्रसंघ पछिको सबैभन्दा ठूलो सञ्जालका रुपमा स्थापित असंलग्न राष्ट्रका सभामुखको सम्मेलनमा भू–राजनीतिक तनाव, हतियारको दौड, सैन्य खर्च वृद्धि, खाद्य संकट, जलवायु परिवर्तन, आर्थिक मन्दी र मानवीय संकट लगायतको समस्या असंलग्नताको सिद्धान्तले मात्रै हल गर्न सक्ने विषयमा समान धारणा बनेको बताउनुभएको हो।असार १६ र १७ गते बाकुमा सम्पन्न सम्मेलनले असंलग्न राष्ट्रका सभामुख बीचमा सौहार्द सम्बन्ध एवं एकता कायम भएको जानकारीसमेत सभामुख सापकोटाले गराउनुभयो। सञ्जाललाई संगठनमा रुपान्तरित गर्नुपर्ने एवं यसको कामलाई दुनियाँले राम्रोसँग सुन्ने गरी बुलन्द गर्नुपर्ने विषयमा बहस भएको उहाँको भनाइ छ। उहाँले भन्नुभयो, ‘‘हामीले नेपालबाट सोचेर गएको विषय र नाम राष्ट्रका बीचमा समान धारणा रहेको पायौं, हामीले सम्मेलनमा राखेको राष्ट्रको दृष्टिकोणमा पनि असंलग्नताको सिद्धान्तको सान्दर्भिकता र अपरिहार्यता अझ बढेर गएको छ।’’उहाँले नेपाली प्रतिनिधि मण्डलका तर्फबाट सम्मेलनको मुख्य कार्यक्रममा सहभागिता र सम्बोधनबाहेक दुई पक्षीय भेटवार्ता र छलफल भएको जानकारी दिनुभयो। आठ लाख नेपाली रोजगारीमा रहेको मलेसियामा नेपालीको स्थिति, उनीहरुका सेवा सुविधाको सम्बन्धमा ध्यानाकर्षण गराउन छलफल मलेसियासँग छलफल भएको उहाँको भनाइ छ। बंगलादेश, जोर्डन, किर्गिजस्थान, मोरक्को, बहराइन, यमन, अल्जेरिया र बुरुण्डीका प्रतिनिधिसँग छलफल भएको सभामुख सापकोटाले जानकारी दिनुभयो। सभामुख सापकोटाको नेतृत्वमा असार १४ गते अजरबैजानको बाकु प्रस्थान गरेको नेपाली संसदीय प्रतिनिधि मण्डल आइतबार साँझ स्वदेश फर्किएको हो। प्रतिनिधि मण्डलमा सांसद पुष्पा भुसाल गौतम, रामचन्द्र राई र सभामुखका स्वकीय सचिव गोविन्द पाठक सहभागी हुनुहुन्थ्यो।
माओवादी केन्द्रले टुंगो लगायो ३७३ केन्द्रीय सदस्य (सूचीसहित)
काठमाडौं, असार १९ गते। नेकपा (माओवादी केन्द्र)ले केन्द्रीय सदस्यको टुंगो लगाएको छ। आइतबारबाट सुरु भएको केन्द्रीय समिति बैठकका लागि अध्यक्ष पुष्पकमल दाहालले ३७३ सदस्यीय केन्द्रीय सदस्यको नाम टुंगो लगाउनुभएको हो। ३७७ केन्द्रीय सदस्य रहने भनिएको केन्दीय समितिमा ज्येष्ठ कम्युनिस्ट लिग, अनुशासन आयोग र लेखा आयोगका संयोजक पदेन सदस्य रहनेछन्। काठमाडौंको कमलादीमा माओवादी केन्द्रीय समिति बैठक आइतबार सुरु भएको हो।सूचीमा हेर्नुहोस् केन्द्रीय सदस्य
लोसपाको पार्टी विधान संशोधनसहित पारित
काठमाडौं, असार १९ गते।लोकतान्त्रिक समाजवादी पार्टी (लोसपा) को केन्द्रीय कार्यकारिणी समितिले पार्टी विधान २०७८ संशोधनसहित पारित गरेको छ ।बबरमहलस्थित केन्द्रीय कार्यालयमा अध्यक्ष महन्थ ठाकुरको नेतृत्वमा शनिबार र आइतबार दुई दिन बसेको बैठकले सो निर्णय गरेको हो ।अध्यक्ष ठाकुरले आइतबार बैठकका निर्णयहरु प्रेस विज्ञप्तिमार्फत जानकारी दिनुहुँदै सरकारले जेठ २३ गते जारी गरेको नियमावली राजपत्रमा प्रकाशित भू–उपयोग नीतिप्रति गम्भिर ध्यानाकर्षण भएको जनाइएको छ।अव्यवहारिक तथा षड्यन्त्रपूर्वक ल्याइएको सो नियमावलीले संस्कृतिमाथि समेत प्रहार गरेको निष्कर्श निकाल्दै तत्काल खारेज गर्नुपर्ने लोसपाले माग गरेको छ ।बैठकले यी लगायत अनावृष्टि र हालको अतिवृष्टिले देशको मुख्य धानखेतीमा व्यापक क्षति पु¥याएको, गाउँ–गाउँमा पसेको बाढी र जल जमावले जनधनको नोक्सानी एवम् जनजीवन अस्तव्यस्त पारेको सन्दर्भमा सरकार मौन देखिएकाले असार २७ गते प्रधानमन्त्री समक्ष ज्ञापनपत्र बुझाउने निर्णय गरेको छ।
कांग्रेस पदाधिकारी बैठक मंगलबार
गोरखापत्र अनलाइन काठमाडौं, असार १९ गते। नेपाली कांग्रेसका भ्रातृ तथा शुभेच्छुक संस्थाको विधानलाई टुङ्गो लगाउन तथा समसामयिक राजनीतिक विषयमा छलफल गर्न काँग्रेस पदाधिकारीको बैठक मङ्गलबार बस्ने भएको छ। पार्टी केन्द्रीय कार्यालय सानेपामा बस्ने बैठकको पूर्व तयारी उपसभापति पूर्णबहादुर खड्काले गर्दै हुनुहुन्छ। पार्टीका मुख्य सचिव एवम् राष्ट्रिय सभाका सदस्य कृष्णप्रसाद पौडेलका अनुसार, भ्रातृ तथा शुभेच्छुक संस्थाको विधानमा एकता रुपता ल्याउन र असार २७ गते बस्ने केन्द्रीय कार्यसमितिको बैठकका सन्दर्भमा पनि छलफल हुनेछ। बैठकमा सभापति एवम् प्रधानमन्त्री शेरबहादुर देउवा, दुई उपसभापति, दुई महामन्त्री, आठ सहमहामन्त्री र नेताहरूद्वय एनपी साउथ र गुरुराज घिमिरेलाई पनि आमन्त्रण गरिएको छ। कांग्रेसले केही समय पहिले केन्द्रीय सदस्य एनपी साउथको संयोजकत्वमा सात सदस्यीय समिति बनाएर भ्रातृ तथा शुभेच्छुक संस्थाको विधानको अध्ययन र विश्लेषण गरेको थियो।कांग्रेसले पाँच वटा भ्रातृ संस्थाको विधान पारित गरिसकेको छ भने अन्यको बाँकी रहेको छ। विधानको अभावमा कांग्रेसका अधिकांश भ्रातृ संस्थाको अधिवेशन हुन सकिरहेको छैन।
शीर्ष पाँच नेताको भेटवार्ता : छलफललाई निरन्तरता दिने सहमति
काठमाडौं, असार १९ गते। तीन पूर्व प्रधानमन्त्री र दुई पूर्व उपप्रधानमन्त्रीबीच सामूहिक भेटवार्ता भएको छ। साविक नेपाल कम्युनिष्ट पार्टी (नेकपा)का बहुमत सचिवालय सदस्यबीच आइतबार ललितपुरमा भेटवार्ता भएको हो। नेकपा (माओवादी केन्द्र)का अध्यक्ष पुष्पकमल दाहाल, नेकपा (एकीकृत समाजवादी)का अध्यक्ष माधव नेपाल, सम्मानित नेता झलनाथ खनाल, नेकपा एकता अभियानका संयोजक वामदेव गौतम र माओवादी केन्द्रका नेता नारायणकाजी श्रेष्ठबीच भएको भेटवार्तालाई अर्थपूर्ण रुपले हेरिएको छ। ललितपुरको हात्तीवनस्थित एक निजी निवासमा भएको भेटमा वर्तमान राष्ट्रिय राजनीतिलगायत विविध विषयमा छलफल भएको माओवादी केन्द्रका अध्यक्ष दाहालकी छोरी गांगा दाहालले जानकारी दिनुभयो। भेटमा स्थानीय निर्वाचन, वाम तथा समाजवादी आन्दोलन, कांग्रेससँगको गठबन्धनका विषयमा छलफल भएको उहाँको भनाइ छ। पाँच नेताबीचको भेटमा छलफललाई निरन्तरता दिने समझदारी भएको उहाँले प्रष्ट पार्नुभयो। ‘‘भेटवार्ताका क्रममा वर्तमान राष्ट्रिय राजनीति, राष्ट्रिय स्वाधीनताको स्थिति, स्थानीय निर्वाचन, वाम तथा समाजवादी आन्दोलन, नेपाली कांग्रेससँगको गठबन्धन आदि विषयमा छलफल भएको छ’’, दाहालले फेसबुकमा लेख्नुभएको छ, ‘‘नेतृत्व तहको यो छलफललाई निरन्तरता दिने समझदारी पनि बनेको छ।’’
सञ्चारमन्त्री कार्की र भारतीय राजदूत श्रीवास्तबीच भेटवार्ता
गोरखापत्र अनलाइन काठमाडौं, असार १९ गते। सञ्चार तथा सूचना प्रविधिमन्त्री एवम् नेपाल सरकारका प्रवक्ता ज्ञानेन्द्रबहादुर कार्कीसँग नेपालका लागि भारतीय राजदूत नवीन श्रीवास्तवले भेटवार्ता गर्नुभएको छ। आइतबार सिंहदरबारस्थित सञ्चार तथा सूचना प्रविधि मन्त्रालयमा मन्त्री कार्कीसँग नवनियुक्त राजदूत श्रीवास्तवले भेटवार्ता गर्नुभएको हो। भेटमा द्विपक्षीय सम्बन्ध र आपसी हितका विषयमा कुराकानी भएको सञ्चार मन्त्रीको निजी सचिवालयले जनाएको छ।
