इण्डियन आर्ट फेयरमा मार्फाका गह्रा

काठमाडौँ, माघ २८ गते । भारतको नयाँदिल्लीमा भइरहेको १०औँ इण्डिया आर्ट फेयरमा नेपालका सात चित्रकलाकारका चित्र समावेश भएको छ । 

नेपाल कला परिषद्का उपाध्यक्ष सागरशम्शेर राणा र कला निरीक्षक स्वस्ति राजभण्डारीले संयोजन गरेको सो मेलामा नेपालका जीवन राजोपाध्याय, चिराग बाङ्देल, सुजन डङ्गोल, रवीन्द्र श्रेष्ठ, मेख लिम्बू, सविता डङ्गोल र सुनिता महर्जनका चित्र राखिएका छन् ।
यही माघ २६ देखि २९ गतेसम्म ओख्ला इण्ड्रष्ट्रियल ग्राउण्ड, नयाँदिल्लीमा भएको मेलामा यो नेपालको तेस्रो सहभागिता हो । सन् २००८ देखि शुरु भएको यस्तो मेला चित्रकलामा दक्षिण एशियाकै ठूलो मेला मानिन्छ । राजोपाध्यायको अशीर्षक, बाङ्देलको ‘गीत गोविन्द’, सुजनको ‘तीन पुस्ता’, महर्जनको ‘मार्फाका गह्रा’ शीर्षकलगायत चित्र प्रदर्शनीमा राखिएका छन् । राजोपाध्यायको लयात्मक रुपमा अमूर्तता, बाङ्देलको कृष्णलीला, सुजनको राष्ट्रिय एकता र सामाजिक समता, महर्जनको वर्गीकृत भूदृश्य र लिम्बूको कलामा बसाइँसराइ र आन्तरिक विस्थापनका विषय भेटिन्छ ।
परिषद्का उपाध्यक्ष राणाले सात जना कलाकारका चित्रले समसामयिक नेपाली कलाको प्रतिनिधित्व गर्दै वर्तमान नेपाली समाज, मानिसहरुको भावनात्मक सङ्घर्ष, आध्यात्मिक र मानवीय सम्बन्ध आदि प्रस्तुत गरेको बताउनुभयो । (रासस)

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds