पनौतीमा रु. छ करोडको गोलभेँडा उत्पादन

मधुसुधन तिमल्सिना

 

पनौती (काभ्रे), भदौ २९ गते । पनौती नगरपालिकाका कृषकले गोलभेँडा खेतीबाट वार्षिक छ करोड रुपियाँभन्दा बढी आम्दानी भिœयाउन सफल भएका छन् ।  परम्परागत खेती छाड्दै व्यावसायिकता तर्फ आर्कषित यहाँका किसानले प्लास्टिक घरभित्र गरिएको गोलभेँडा खेतीबाट राम्रो आम्दानी लिन सफल भएका हुन् ।
पनौती नगरपालिका भित्र मात्र वार्षिक छ करोड रुपियाँभन्दा बढीको गोलभेँडा उत्पादन हुने गरेको जिल्ला कृषि विकास कार्यालयका बाली संरक्षण अधिकृत देवराज अधिकारीले जानकारी दिनुभयो । यो त एकदमै कम भाउ पाएको समयमा हो, उहाँले थप्नुभयो, अघिल्ला वर्षमा त आठ करोड रुपियाँभन्दा बढी आम्दानी लिएका थिए । tomatoo
उहाँका अनुसार पनौती नगरपालिकामा मात्र रहेका एक हजार दुई सय प्लास्टिक घरमा किसानले व्यावसायिक रूपमा गोलभेँडा खेती गरिरहेका छन् । एक प्लास्टिक घरमा १५० देखि दुई सय बोटसम्म रहने र एक बोटबाट सरदर आठ केजी गोलभेँडा फल्ने गरेको छ । यस हिसाबबाट वार्षिक एक लाख ८० हजार बोटबाट १४ लाख ४० हजार केजी गोलभेँडा पनौतीमा मात्र उत्पादन हुने गरेको छ ।
कम मूल्य पाएको समयमा प्रतिकेजी ४० रुपियाँमा बेच्दैआएको पनौती नगरपालिका–८ का कृषक राधेश्याम श्रेष्ठले जानकारी दिनुभयो । पोहोर त ९० रुपियाँ सम्ममा बेचियो तर यस वर्ष धेरै कम भनेको ४० हो नत्र ५०÷६० त घट्दैन । बोट मरेन र राम्रो फल्यो भने त कहिले काँही एक बोटबाटै १० केजीसम्म हुन्छ, कृषक श्रेष्ठले भन्नुभयो । उहाँले २० वटा प्लास्टिक घरमा गोलभेँडा खेती गर्दैआउनुभएको छ । धान, आलु, गहुँ, मकै लगाउने खेत यति खेर प्लास्टिक घरले सेताम्मे भएका छन् । एकै कृषकले १५ देखि ९० वटासम्म प्लास्टिक घरमा गोलभेँडा खेती गर्दैआएका छन् । बजारका लागि नजिकै राजधानी रहनु र यहाँको उत्पादन अन्यत्र पोखरा, भैरहवा, बुटवल, वीरगञ्ज लगायतका सहरमा समेत सिधै लैजाने व्यापारी आउने भएकाले पनि कृषकको रोजाइमा गोलभेँडा खेती पर्नेगरेको छ । जिल्लाका पनौती, पाँचखाल, बनेपा, महादेवस्थान, चण्डनीमण्डन, धुलिखेल, नाला लगायतका स्थानमा बढी गोलभेँडा उत्पादन हुने क्षेत्र रहेको कृषि विकास कार्यालयले जनाएको छ ।

थप समाचार
प्रतिकृया
नाम

ईमेल

ठेगना