अमरराज नहर्की
तनहुँ, फागुन २९ गते । तनहुँको देवघाट धाममा नुहाउने क्रममा बगाएर एक तीर्थयात्री बेपत्ता हुनुभएको छ ।
देवघाट गाउँपालिका–५ त्रिशूली र कालीगण्डकी नदीको सङ्गमस्थलमा सोमबार दिउँसो नुहाउने क्रममा डुबेर बेपत्ता भएको प्रहरीले जनाएको छ । बेपत्ता भएका व्यक्तिको नाम थर र वतन भने खुल्न नसकेको जिल्ला प्रहरी कार्यालय तनहुँका प्रहरी नायब उपरीक्षक मोहनबहादुर खाँडले जानकारी दिनुभयो । पहेँलो कुर्था, पहेँलो कछाड,पहेँलो आस्कोट,सेतो चप्पल र लट्ठी नदीको सङ्गमस्थलमा भेटिएको खाँणले बताउनुभयो ।
बेपत्ता भएका व्यक्तिको खोजतलास गरिए पनि सोमबार साँझ अबेरसम्म फेला पार्न नसकिएको प्रनाउ खाँडले जानकारी दिनुभयो उक्त घटना सम्बन्धमा थप अनुसन्धान भइरहेको प्रहरीले जनाएको छ ।
