मुगु, फागुन १९ गते । मुगुम कार्मारोङ गाउँपालिकामा एक पुरुषको ढुङ्गा लागेर मृत्यु भएको छ । मुगुम कार्मारोङ-६ रिउस बगरमा रहेको जलविद्युतमा काम गर्न घरबाट हिँडेका सोही गाउँपालिका-५ का ५० वर्षीय कोन्जोक लाक्याप लामाको सडक माथिबाट आएको ढुङ्गा लागेर मृत्यु भएको हो ।
विद्युत् गृहको नहर पहिरोले क्षति गरेपछि वडा नम्बर ५ र ६ का स्थानीयको शनिबार काम गर्ने पालो थियो । सोही कामका लागि मृतक लामासहित अन्य चार जना सेरोग गाउँबाट रिउस आउँदै गर्दा तिलिकछु भन्ने स्थानमा माथिबाट आएको ढुङ्गा लागेर लामालाई घाइते बनाएको थियो ।
घाइते भएका लामालाई स्थानीय र पुलु प्रहरी चौकीले तत्काल उद्धार गरी पुलु स्वास्थ्य चौकी पुर्याए पनि त्यहाँ उपचार हुन नसकेपछि थप उपचारका लागि जिल्ला अस्पताल गमगढी लैजाँदै गर्दा बिच बाटोमा मृत्यु भएको गाउँपालिका अध्यक्ष छिरिङ क्याप्ने लामाले जानकारी दिनुभयो । रासस
