अपाङ्गता भएकी महिलालाई बलात्कार गर्ने टमटा प्रहरी नियन्त्रणमा

राजन रावत

हुम्ला, फागुन १५ गते । अपाङ्गता भएकी महिलालाई बलात्कार गरेको आरोपमा अदानचुली गाउँपालिका–६ को पाल्स गाउँका ३४ वर्षका दीपक टमटालाई प्रहरीले नियन्त्रणमा लिएको छ । घटना भएको नौ दिनपछि प्रहरीले टमटालाई  नियन्त्रणमा लिन सफल भएको हो ।

जिल्ला प्रहरी कार्यालयका प्रहरी निरीक्षक नरेन्द्र चन्दले उचाइ कम भएकी अपाङ्गता भएकी महिलालाई बलात्कार गरेको आरोपमा टमटालाई प्रहरीले बाजुरा जिल्लाकाे धुलाचौरबाट नियन्त्रणमा लिन सफल भएको बताउनुभयो ।

‘‘पीडित महिलाले आफ्नो उजुरीमा दीपक टमटाको नाम थाहा नभएपछि मोबाइल नम्बर उल्लेख गर्नुभएको थियो । मोबाइल नम्बरको सिमकार्डमा रहेको नामबाट पीडकको नाम पत्ता लागेको थियो ।,’’ प्रहरी निरीक्षक चन्दले भन्नुभयो, ‘‘मोबाइल नम्बरबाट आरोपी टमटालाई प्रहरीले बाजुरा जिल्लामा नियन्त्रणमा लिन सफल भएको हो ।’’

जिल्ला प्रहरी कार्यालयको हिरासतमा रहेको टमटाले ती महिलालाई करणी गरेको स्वीकार गरेको उहाँले बताउनुभयो । जिल्ला अदालतबाट सातदिने म्याद थप गरी अनुसन्धान भइरहेको उहाँले बताउनुभयो ।

प्रहरीले अदालतमा मुद्दा दर्ता गरिसकेको छ । यही फागुन ४ गते राति १० बजे टमटाले अपाङ्गता भएकी महिलालाई जबरजस्ती गरेकाे उहाँको भनाइ छ । पीडित महिलाले फागुन ९ गते प्रहरी कार्यालयमा उजुरी दर्ता गर्नुभएको थियो ।

आफू घरमा सुतिरहेको अवस्थामा अदानचुली गाउँपालिका– ६ को पाल्सगाउँ घर बताउने टमटाले बलात्कार गरेको उजुरीमा छ ।