प्रणय दिवसमा ‘सौराहा फुड फेस्टिवल’

चितवन, माघ २० गते । रेष्टुरेण्ट एण्ड बार एसाेसिसन नेपाल (रेवान) को आयोजनामा यही माघ २८ गतेदेखि सौराहा फुड फेस्टिवलको आयोजना गरिँदै छ । प्रणय दिवसको अवसरमा पर्यटकीय नगरी सौराहामा ‘१८औँ सौराहा फुड फेस्टिवल’ आयोजना गर्न लागिएको हो ।

सौराहासहित चितवनको पर्यटन प्रवर्द्धन तथा विकासका लागि प्रणय दिवसको अवसर पारेर फेस्टिवल आयोजना गर्न लागिएको रेवानका अध्यक्ष ध्रुव गिरीले जानकारी दिनुभयो । उहाँका अनुसार फेस्टिवल आगामी फागुन ३ गतेसम्म सञ्चालन हुनेछ । खाना, सङ्गीत र संस्कृतिलाई सँगसँगै अगाडि बढाएर फेस्टिवललाई विशेष बनाउने तयारी गरिएको गिरीले बताउनुभयो । उहाँले भन्नुभयो,“सौराहा फुड फेस्टिवलको आफ्नै गौरवमय इतिहास छ । हरेक वर्ष प्रणय दिवसको अवसरमा फेस्टिवल आयोजना गरिँदै आइएको छ ।”

फेस्टिवलमा सञ्चालन हुने पर्यटन प्रवर्द्धनात्मक  गतिविधिले कालान्तरसम्म पर्यटक भित्र्याउन टेवा पुग्ने रेवानका अध्यक्ष गिरीको भनाइ छ । आज पत्रकार सम्मेलनको आयोजना गरी रेवानले फेस्टिवलको बारेमा जानकारी दिएको हो । विभिन्न खालका विषम परिस्थितिमा पनि फेस्टिवललाई निरन्तरता दिँदै आइरहेको अध्यक्ष गिरीले बताउनुभयो । उहाँका अनुसार कोराना महामारीपछि सौराहासहित चितवनको पर्यटन पुरानै अवस्थामा फर्किने क्रममा रहेको छ । यहाँको पर्यटनलाई पुरानै अवस्थामा फर्काउने गरी फेस्टिवलका गतिविधिलाई अगाडि बढाइने फेस्टिवका संयोजक सूर्यबहादुर रिमालले पत्रकार सम्मेलनमा जानकारी दिनुभयो ।  

समग्र सौराहाको पर्यटन विकास गर्ने, विभिन्न जातजातिका परम्परागत तथा स्थानीय, स्वदेशी, विदेशी खानाको प्रवर्द्धन गर्ने, स्थानीय कलासंस्कृति, भेसभुसाको जगेर्ना गर्दै पर्यटकीय गन्तव्यका रूपमा सौराहालाई राष्ट्रिय तथा अन्तराष्ट्रियस्तरमा पहिचान गराउने, उज्यालो सौराहालाई निरन्तरता दिइने, प्रवेश टिकटबाट भएको आम्दानीले पर्यटन मार्गको सौन्दर्यकरण गर्ने उद्देश्यले फेस्टिवल आयोजना गरिएको उहाँले बताउनुभयो । दैनिक पाँच हजार पर्यटकले अवलोकन गर्ने अपेक्षा गरिएको फेस्टिवलमा ६० लाख अनुमानित खर्च हुने र तीन करोड कारोबार हुने अनुमान गरिएको छ । रासस