सवारी दुर्घटनामा साइकल यात्रीको मृत्यु

भक्तिविलास पोखरेल

गाईघाट, पुस २६ गते । उदयपुरमा सवारी दुर्घटनाबाट एक साइकल यात्रीको घटनास्थलमा नै मृत्यु भएको छ । मदन भण्डारी स्मृति लोकमार्गको पूर्वबाट पश्चिमतर्फ जाँदै गरेको प्र-०५-००१-ज-००३५ नम्बरको इलेक्ट्रिकल भ्यानले विपरीत दिशाबाट आउँदै गरेको साइकललाई ठक्कर दिँदा रौतामाई गाउँपालिका-७ पुवाँरेका ४५ वर्षीय तुलसी मगरातीको बुधबार राती मृत्यु भएको प्रहरीले जनाएको छ ।

त्रियुगा नगरपालिका-८ स्थित साहिखोलाबाट घर निर्माणको काम गरी फर्कनेक्रममा सोही वडाको राजाबासमा उक्त दुर्घटना हुँदा निजको मृत्यु भएको जिल्ला प्रहरी कार्यालय उदयपुरका प्रहरी प्रमुख प्रहरी उपरीक्षक रमेश थापाले बताउनुभयो । घटना लगत्तै प्रहरीले सवारी र चालकलाई नियन्त्रणमा लिई अनुसन्धान सुरु गरेको र मृतकको शव पोष्टमार्टमको लागि जिल्ला अस्पतालको शव गुहमा राखिएको प्रहरी उपरीक्षक थापाले बताउनुभयो ।