मोरङको जङ्गलमा मृत हात्ती फेला

शशिधर पराजुली 

विराटनगर, पुस १६ गते । मोरङको सुन्दरहरैंचा नगरपालिकाको जङ्गलमा हात्ती मृतावस्थामा फेला परेको छ । स्थानीय जनजागरण सामुदायिक वनमा मृत भेटिएका हात्तीकाे गोली लागरे मृत्यु भएकाे हुनसक्ने आशङ्का स्थानीयहरुको छ । 

उक्त सामुदायिक वनसँग जोडिएको राष्ट्रिय वनक्षेत्रमा झण्डै ४० हात्तीका बथान आवतजावत गर्ने गर्छन् । बस्ती क्षेत्रमा आउने र फर्केर जङ्गलमै जाने गर्दा स्थानीयमा त्रास बढेको थियो । 

हात्ती मृत भेटिएपछि डिभिजन वन कार्यालय मोरङ र कोशी टप्पु वन्यजन्तु आरक्षबाट भेटनरी चिकित्सकसहितको टोली पुगेर पोष्टमार्टम गर्ने काम भइरहेको डिभिजन वन कार्यालय मोरङका प्रमुख विष्णु घिमिरेले जानकारी दिनुभयो । 

प्रमुख घिमिरेले आफूहरु घटनास्थलमा पुगेर अनुसन्धान थालिएको जानकारी दिनुभयो । उहाँले पोष्टमार्टमपछि घटनाबारे थप विवरण आउने बताउनुभयो । उहाँका अनुसार जङ्गलमा करिब १०-१२ वर्षको भाले हात्ती मारिएको अवस्थामा भेटिएको हो ।