कस्तुरीको बिना बरामद

सिराज खान 

नेपालगन्ज, पुस ७ गते।  नेपालगन्जको सीमा क्षेत्रबाट प्रहरीले कस्तुरीको बिना बरामद गरेको छ।  भारतबाट नेपाल भित्र्याउने क्रममा सशस्त्र प्रहरीले जमुनाहा नाकाबाट पाँच थान कस्तुरीको बिना बरामद गरेको हो। 

नेपालगन्जको जमुनाहास्थित सशस्त्र प्रहरीको प्रस्तावित भन्सार गुल्म जमुनाहाले भारतबाट नेपाल ल्याउँदै गरेको अवस्थामा कस्तुरीको पाँच थान बिना बरामद गरेको सशस्त्र प्रहरी बल नेपाल नम्बर ३० गण हेडक्वाटर बागेश्वरीका प्रमुख एसपी रमेश विक्रम शाहीले जानकारी दिनुभयो।  

भारतबाट आइरहेका एक जनाको झोला शङ्का लागेर जमुनाहा भन्सारमा चेकजाँच गर्दा झोलामा कस्तुरीको बिना पाँच थान फेला परेको हो।  

चेकजाँचकै क्रममा कस्तुरीको बिना लिएर आउने व्यक्ति फरार भएको एसपी शाहीले बताउनुभयो।  उहाँले सशस्त्र प्रहरीले बरामद गरेको कस्तुरीको तौल ८१ ग्राम रहेको बताउनुभयो।  पाँच थान कस्तुरीको बिनालाई डिभिजन वन कार्यालय नेपालगन्जमा बुझाइएको छ।  

उक्त कस्तुरीको बिनालाई आवश्यक जाँचका लागि वन कार्यालयले राष्ट्रिय विधि विज्ञान प्रयोगशाला खुमलटार पठाएको जानकारी प्राप्त भएको सशस्त्र प्रहरी बल नेपाल नम्बर ३० गण हेडक्वाटर बागेश्वरीले जनाएको छ।