.jpg)
शेरबहादुर राई
ओखलढुङ्गा, पुस ४ गते । लुटपाटपछि वृद्धाको हत्या गरेको आरोपमा तीन जना पक्राउ परेका छन् । ओखलढुङ्गाको मोलुङ गाउँपालिका–३ की ८२ वर्षीय बालामाया सुनुवारको हत्या आरोपमा प्रहरीले तीन जनालाई पक्राउ गरेको हो ।
अनुसन्धानका लागि पक्राउ गरिएकाले पक्राउ परेकाहरूको पहिचान सार्वजनिक नगरिएको जिल्ला प्रहरी कार्यालय ओखलढुङ्गाका सूचना अधिकारी, प्रहरी निरीक्षक बालिस्टर सिंहले बताउनुभयो । अनुसन्धान पश्चात् पक्राउ परेकाहरूको विवरण सार्वजनिक गरिने प्रहरी निरीक्षक सिंहको भनाइ छ ।
सुनुवार गत ३० मङ्सिरमा आफ्नै घरभित्र झुण्डीएको अवस्थामा मृत फेला पर्नुभएको थियो । प्रारम्भिक अनुसन्धानका क्रममा लुटपाटपछि हत्या भएको हुनसक्ने प्रहरी र स्थानीयले अनुमान गरेका छन् । प्रहरीका अनुसार सुनुवारको मुख, कानको पछाडिको भाग, हातको औँलामा चोट तथा रगत देखिएको र घटना शङ्कास्पद भएको हो ।
गहना तथा धनमाल लुटपाटपछि कसैले हत्यागरेको हुनसक्ने आशङ्कामा अनुसन्धान कार्यलाई तीव्र बनाइएको प्रहरी निरीक्षक सिंहले जानकारी दिनुभयो ।
