तिलाचन पाण्डे
तम्घास, पुस २ गते । गुल्मीमा १० दिनदेखि हराइरहेका बालक जङ्गलमा मृत फेला परेका छन् । जिल्लाको चन्द्रकोट गाउँपालिका वडा नम्बर ३ हर्राचौरका ६ वर्षका बालक मृत अवस्थामा जङ्गलमा फेला परेको प्रहरीले जनाएको छ ।
मङ्सिर २२ गते घरबाट हराएका बालकलाई खोज्ने क्रममा घर नजिकैको गगनगैरा भन्ने जङ्गलमा मृत अवस्थामा फेला परेका थिए ।
मृत फेला परेका बालकको शव केही भाग जङ्गली जनावरले खाएको अवस्थामा रहेको प्रहरीले जनाएको छ ।
जङ्गलमा बालक मृत फेला परेपछि थप अनुसन्धानका लागि जिल्ला प्रहरी कार्यालय गुल्मीबाट प्रहरी नायब उपरीक्षक (डिएसपी) डिल्लीनारायण पाण्डेको कमाण्डमा टोली घटनास्थलतर्फ लागेको छ । घटनाको स्थलगत अवस्था हेरेपछि मात्रै कारण खुल्ने उहाँले बताउनुभयो ।
