अवैध हतियार र लागुऔषधसहित दुई जना पक्राउ

काठमाडौं, मंसिर २९ गते । प्रहरीले अवैध हतियार र लागू औषध खैरो हिरोइनसहित दुई जनालाई पक्राउ गरेको छ । 

काठमाडौं उपत्यका अपराध अनुसन्धान कार्यालयका सूचना अधिकृत प्रहरी उपरीक्षक मिलन केसीका अनुसार भक्तपुरको सूर्यविनायक नगरपालिका वडा नं. १० नलिन्चोक क्षेत्रमा अवैध अतियार तथा लागू औषधको ओसारप्रसार तथा कारोबार हुँदैछ भन्ने गोप्य सूचना प्राप्त भएपश्चात् ४१ वर्षीय चिरन्जीवी सिन्चुरी र ३१ वर्षीय लेख बहादुर कार्कीलाई पक्राउ गरिएको हो ।

उनीहरुबाट प्रहरीले लागू औषध खैरो हिरोइन जस्तो देखिने लेसिलो पदार्थ पाँच ग्राम, पेस्तोल एक थान, ऐ. को गोली राउण्ड पाँच थान, ऐ. को म्याग्जिन दुई थान र मोबाइल दुई थान बरामद गरेको जानकारी दिएको छ ।

प्रहरीका अनुसार लागू औषध तथा हातहतियार खरखजना सम्बन्धी कसुरमा आवश्यक कारबाही तथा थप अनुसन्धानको लागि उनीहरुलाई प्रहरी वृत्त जगाती भक्तपुर पठाइएको छ ।