बाबुराम देवकोटा
सिन्धुलीमाढी, मङ्सिर २८ गते । सङ्घीय सरकारको सहयोगमा सिन्धुली जिल्लाको मरिण गाउँपालिका–७ महादेवस्थानमा तीन वर्षदेखि महादेवस्थान खानेपानी योजना निर्माणाधीन अवस्थामा छ ।
तर वर्षेनी आउने न्यून बजेटले एक करोड रुपियाँभन्दा माथिको लागत रहेको उक्त बहुवर्षे खानेपानी योजना कति वर्षमा पूरा हुने भन्ने निश्चित नभएको स्थानीय उपभोक्ताको गुनासो छ ।
उक्त योजनाका लागि यो वर्ष पनि २५ लाख रुपियाँ बजेट आएको र योजनाको काम सुरु गर्न चार पटकसम्म जाँदा पनि सम्झौता हुन नसकेको उक्त योजना उपभोक्ता समितिका अध्यक्ष ईश्वर थिङले गुनासो गर्नुभयो । उहाँका अनुसार उक्त योजनाको कार्यान्वयन खानेपानी तथा सरसफाइ डिभिजन नं. ४ रामेछाप फिल्ड कार्यालय सिन्धुलीले गरेको छ । "योजना सम्झौता गर्न यो वर्ष मात्रै उक्त कार्यालयमा चार पटक गई सक्यौं," उहाँले भन्नुभयो, "कहिले इन्जिनियर छैन भन्छ, कहिले के भन्छ । उसैले समय दिएको छैन ।"
उक्त योजनाका लागि गत वर्ष पनि ३० लाख रुपियाँ बजेट आएकोमा ढिलासुस्तीकै कारण झण्डै २३ लाख रुपियाँ बराबरको काम भएको र बाँकी बजेट फ्रिज भएको उहाँले सुनाउनुभयो । उहाँका अनुसार एक घर, एक धारा हुने गरी निर्माण सुरु गरिएको उक्त योजनाको काम झण्डै ७० प्रतिशत सकिएको छ । महादेवस्थान खानेपानी योजना निर्माण पूरा हुदा १२५ घर परिवारलाई खानेपानी सुविधा पुग्नेछ ।
फिक्कल गाउँपालिका–३ मा सञ्चालित चनौटे–गिनीचौर खानेपानी योजनाको अवस्था पनि उस्तै छ । सङ्घीय सरकारको सहयोगमा सञ्चालित बहुवर्षीय उक्त योजना पनि दुई वर्षदेखि निर्माणाधीन अवस्थामा छ । उक्त योजनाका लागि यो वर्ष सात लाख रुपियाँ आएको उक्त योजना उपभोक्ता समितिका अध्यक्ष मोहनबहादुर कार्कीको गुनासो छ ।
"चनौटे–गिनीचौर खानेपानी योजना पूरै वडाका वासिन्दालाई खानेपानी खुवाउने गरी सञ्चालिन योजना हो," उहाँले भन्नुभयो, "यो योजनाको काम खण्ड खण्डमा भइरहेको छ । तर वर्षेनी आउने न्यून बजेटले काम नै देखिँदैन । झगरे–खुरहरी खण्डको काम पनि अधुरो अवस्थामा छ ।" उक्त योजना स्वीकृत भएको १२ वर्ष जति भएको र अहिलेसम्म पाँच वटा खण्डको काम सकिएको उहाँले जानकारी दिनुभयो । उपभोक्ता समितिका अध्यक्ष कार्कीका अनुसार तर वर्षेनी आउने न्यून बजेटले उक्त योजना पूरै निर्माण सम्पन्न गर्न कति वर्ष लाग्ने भन्ने सास्ती खेप्नुपरेको छ । पूरै योजना सम्पन्न हुँदा उक्त वडाका पाँच सयभन्दा बढी घर धुरीले खानेपानी सुविधा पाउनेछन् ।
खानेपानी तथा सरसफाइ डिभिजन नं. ४ रामेछाप फिल्ड कार्यालय सिन्धुलीका अनुसार सङ्घिय सरकारको सहयोगमा जिल्लामा यो वर्ष तीन वटा शीर्षकमा ४६ वटा खानेपानी योजना सञ्चालन हुने भएका छन् । पुनस्र्थापना कार्यक्रम अन्तर्गत २३ वटा, गुणस्तर सुधार कार्यक्रम अन्तर्गत एउटा र जलवायु अनुकूल बृहत् खानेपानी कार्यक्रम अन्तर्गत २२ वटा योजना छन् ।
पुनःस्थापना कार्यक्रमका योजनालाई छ लाख ५० हजार रुपियाँका दरले, गुणस्तर सुधार कार्यक्रमको योजनालाई २० लाख रुपियाँ र जलवायु अनुकूल बृहत् खानेपानी योजनालाई एक लाख रुपियाँदेखि १० लाख रुपियाँसम्मका दरले बजेट विनियोजन भएको कार्यालय प्रमुख मनोजकुमार मण्डल बताउनुहुन्छ ।
बजेट नै थोरै आएकाले ती योजना यो वर्ष सम्पन्न गर्न नसकिने उहाँको गुनासो छ । कार्यालय प्रमुख मण्डलका अनुसार ती योजना यो वर्ष कार्यान्वयनका लागि धमाधम उपभोक्ता समितिसँग सम्झौता सुरु भएको छ ।
