ट्याक्टर दुर्घटनामा एकको मृत्यु

रेखीराम राना

पाल्पा, मङ्सिर ८ गते । पाल्पामा ट्याक्टर दुर्घटना हुँदा एक जनाको मृत्यु भएको छ । मृत्यु हुनेमा पूर्वखोला गाउँपालिका–५, कर्नेडाँडा बस्ने ४० वर्षीय चन्द्रबहादुर काम्मु रहनुभएको छ । 

शुक्रबार बेलुकी ४ बजेतिर पूर्वखोलाको कर्नेडाँडास्थित भित्री सडकमा लु ४ त ६५५३ नम्बरको ट्याक्टर दुर्घटना हुँदा घाइते हुनुभएका काम्मुको मृत्यु भएको प्रहरीले जनाएको छ । 

घाइते काम्मुलाई उपचारका लागि तानसेनस्थित पाल्पा अस्पतालमा ल्याइए पनि ७ बजेतिर चिकित्सकले मृत घोषणा गरेको जिल्ला प्रहरी कार्यालय पाल्पाका सूचना अधिकारी प्रहरी निरीक्षक सन्तोष चन्दले जानकारी दिनुभयो ।