ठाकुरप्रसाद आचार्य
म्याग्दी, भदौ ३० गते । मुस्ताङको लोमान्थाङ गाउँपालिका-५ स्थित लोमान्थाङमा दोस्रो गल्फ कोर्स प्रतियोगिता सुरु भएको छ । शनिबार बिहान गल्फ प्रतियोगिताको उद्घाटन गरिएको हो ।
विश्वको सबैभन्दा उच्च ४ हजार ६ सय ४५ मिटर उचाइमा प्रतियोगिताको आयोजना सञ्चालन गरिएको छ । प्रतियोगिताले लोमान्थाङको पर्यटन प्रवर्द्धनलाई टेवा पुर्याउने विश्वास गरिएको छ । प्रतियोगितामा काठमाडौँ, धरान, पोखरा, बुटवल लगायतबाट २८ जना खेलाडी सहभागी भएको आयोजकले जनाएका छन् ।
प्रतियोगितामाका विजेता, उपविजेता, महिला विजेता, वेस्ट ग्रास, पिनको नजिक, सबैभन्दा लामो ड्राइभ र बर्डिजलाई पुरस्कारको व्यवस्था गरिएको छ । होल इन वान गर्नेले भने घोडा पाउने प्रतियोगिताका व्यवस्थापक इन्द्र धारा विष्टले जानकारी दिनुभयो । घोडालाई एक लाख रुपियाँ पर्दछ । उहाँले मुस्ताङमा खेल पर्यटनको सम्भावना खोज्न प्रतियोगितालाई निरन्तरता दिइएको बताउनुभयो ।
संसारकै सबैभन्दा उचाइको गल्फ कोर्सको विश्व रेकर्ड बनाउने हाम्रो प्रयास हो विष्टले भन्नुभयो, ‘‘त्यसका लागि आवश्यक प्रक्रियाहरू सुरु गरेका छौँ ।’’ प्रतियोगितालाई आगामी दिनमा पनि निरन्तरता दिने उहाँले बताउनुभयो । प्रतियोगिताका बारेमा संसारभर प्रचारप्रसार गरेर विदेशी खेलाडीहरूलाई पनि आकर्षित गर्ने योजना रहेको उहाँले सुनाउनुभयो ।
अहिलेसम्म सिक्किमको कुपुकमा रहेको याक गल्फ कोर्स (३९७० मिटर) ले विश्वकै सर्वोच्च स्थानमा रहेको गल्फ कोर्सको कीर्तिमान ओगटेको छ । सुरुको दिन नौ होलमा खेल खेलाइने र कुनै कठिनाइ आइनपरे अर्को दिन फेरि नौ होलको खेल खेलाउने तयारी रहेको आयोजकले जनाएका छन् ।
