सुकृत नेपाल
सुकृत नेपाल
काठमाडौँ, भदौ २२ गते । ‘खाँकी’, ‘बेबी,’ ‘स्पेसल अप्स’ चलचित्र निर्देशन गरिसकेका नीरज पाण्डे अर्को एक्सन सिरिज लिएर आउनुभएको छ । फरक ढङ्गले चलचित्र बनाउने उहाँको तरिका यस नयाँ सिरिज ‘दी फ्रिलान्सर’ मा हेर्न सकिन्छ । पाण्डे कथा कथनदेखि पात्रको चरित्र निरूपणसम्म दर्शकलाई व्यस्त बनाउनुहुन्छ । कथा एक सन्दिग्ध व्यक्तिसँग विवाह गरेर आफ्नो हनिमुनमा सिरिया जाने युवतीको अपहरणवरिपरि घुमेको छ ।
शिरीष थोरातको पुस्तक ‘ए टिकट टु सिरिया’ मा आधारित सिरिजले अविनाश कामथ ‘मोहित रैना’ को कथालाई पछ्याउँछ; जो एक पूर्वप्रहरी निरीक्षक फ्रिलान्सर बन्नुभएको छ । उहाँ एउटी केटी आलिया खान (काश्मीरा परदेशी) लाई बचाउने अभियानमा लागिपर्नुभएको हुन्छ । आलिया युद्धग्रस्त सिरियामा बन्दी बन्नुभएको छ । कथा आलिया वरिपरि घुमेको छ, जो भर्खरै विवाह गरी सिरियामा फस्नुभएको छ । उहाँ त्यहाँबाट बाहिर निस्कन सक्दो प्रयास गर्नुहुन्छ । अविनाशलाई डा. अरिफ खान (अनुपम खेर) ले पनि मद्दत गर्नुहुन्छ । अविनाशले आलियालाई कसरी बचाउनुहुन्छ र उहाँले कति कठिनाइ सामना गर्नुहुन्छ भन्ने कुरा नै कथाको मुख्य विषय हो । अविनाश आफ्नो मिसनमा सफल हुनुहुने छ ? के उहाँले आलियालाई सकुशल आफ्नो देश फर्काउन सक्नुहुने छ ? पाण्डेको वेब सिरिज यसैको वरिपरि बुनिएको छ ।
सिरिजमा विगतका घटना र पात्रहरूको वर्तमानलाई निकै फरक ढङ्गबाट बुनिएको छ । प्रत्येक भागमा नयाँ किसिमका कथा र नयाँ पक्षहरू देखा पर्छन् । इनायत खानसँग मुम्बई पुलिस अफिसरका रूपमा अविनाशको जीवन, सानो आलियासँगको खुसीका पलहरू, मृणालसँगको उनको वैवाहिक जीवन, यी सबै मुख्य कथासँगै जोडिएका छन् । यसरी हेर्दा ‘दी फ्रिलान्सर’ एक अद्भुत, आकर्षक र सस्पेन्सले भरिएको सिरिज हो यद्यपि यसमा एक कमजोरी पनि छ । यसलाई दुई भागमा विभाजन गरिएको छ । यसले दर्शकलाई कथानकबाट विच्छेद गर्छ । अविनाश कामथको भूमिकामा मोहित रैनाले आफ्नो उत्कृष्ट प्रदर्शन गर्नुभएको छ । उहाँले चरित्रको आवश्यकता अनुसार बुद्धि र साहस दुवै देखाउनुभएको छ । अनुपम खेर डा. आरिफ खानको गाइडको भूमिकामा देखिनुभएको छ; जसले कथामा गहिराइ थप्छ । सुशान्त सिंहले छोटो भूमिकामा पनि प्रभाव छाड्नुभएको छ ।
यसबाहेक काश्मीरा परदेशीले बन्धक बनाइएकी निर्दोष बालिकाको भावनालाई राम्ररी प्रस्तुत गर्नुभएको छ । आयशा रजा मिश्रा, नवनीत मलिक, गीता शर्मालगायतका कलाकारको भूमिका पनि प्रशंसायोग्य छ ।
निर्माता नीरज पाण्डे र निर्देशक भाव धुलियाले पटकथाको गतिलाई निरन्तरता दिनुभएको छ । पहिलो दृश्यदेखि नै दुवैले दर्शकलाई आफ्नो संसारमा हराउन बाध्य पार्नुभएको छ । पात्रहरूबिचको तनाव र हतासको भावनालाई धेरै प्रभावकारी रूपमा चित्रण गरिएको छ । कथा सुचारु रूपमा अगाडि बढ्छ । यसको गतिले दर्शकलाई रोक्न र सोच्ने कम मौका दिन्छ । पटकथाको गतिले सस्पेन्सलाई कायम राख्न मद्दत गर्छ । कथा विस्तारै विश्वव्यापी राजनीतिक विषयवस्तुलाई पनि ग्रहण गर्दै गहिराइमा पुग्छ । समग्र सिरिजको कुरा गर्ने हो भने कथाले दर्शकलाई आकर्षित बनाउँछ ।
