स्मृति मिश्र
धनुषा, साउन १९ गते । आँखा पाक्ने रोगबाट धेरै सङ्ख्यामा विद्यार्थी प्रभावित हुन थालेपछि जनकपुरधाम उपमहानगरपालिका कार्यालयले नगर क्षेत्रका सामुदायिक तथा संस्थागत विद्यालयहरूलाई एक साताका लागि पठनपाठन बन्द गर्न निर्देशन दिएको छ । आँखा पाक्ने रोगबाट सम्भावित जोखिम न्यूनीकरणका लागि विद्यालय बन्द गर्न र सामाजिक दूरी कायम गर्न सुझावसहितको निर्देशन उपमहानगर कार्यालयले शुक्रबार दिएको हो ।
केही दिनयता जनकपुरधाममा आँखा पाक्ने रोगबाट प्रभावित हुनेहरूको सङ्ख्या बढेको छ । जसमा विद्यालयका छात्रछात्रा बढी छन् । सङ्क्रमित विद्यार्थीमा आँखा पोल्ने, बिझाउने, आँसु धेरै आउने, आँखा रातो देखिने, सुन्निने जस्ता लक्षण देखिएको जनकपुरधामस्थित सङ्कटमोचन माविका प्रधानाध्यापक बलराम साहले बताउनुभयो ।
आँखामा सुक्ष्म जीवाणुहरू ब्याक्टेरिया, भाइरस र प्रटोजोलसँगै एलर्जी, धुलोधुवाँका असर, रासायनिक कुरा आँखामा पर्दा आँखा पाक्ने रोगबाट व्यक्ति प्रभावित हुने चिकित्सकहरू बताउँछन् । पछिल्लोपटक जनकपुरधाममा देखिएको आँखा पाक्ने प्रकोपलाई उपमहानगरपालिका कार्यालयको स्वास्थ्य शाखाले भाइरल कन्जन्टिभाइटिस भनिएको छ ।
आँखा पाक्ने रोग सङ्क्रमितको आँसुबाट सर्ने र विद्यार्थीहरू समूहमा अध्ययन गर्ने हुँदा यस रोगको बढी जोखिममा तिनीहरू पर्ने गरेको मधेश स्वास्थ्य निर्देशनालयका निर्देशक डा.राजीव झाले बताउनुभयो । सङ्क्रमित व्यक्तिले आँखा नछुने र छोएपछि साबुन पानीले हात धुने, स्यानिटाइजर प्रयोग गर्ने जस्ता सतर्कता नअपनाउने गरेकाले एकपछि अर्कामा सङ्क्रमण फैलिँदै गएको छ ।
“आँखा जुधेपछि यो सर्ने भन्ने हल्ला व्यापक भएको छ, “यो झुटा र भ्रामक कुरा हो,” डा.झाले भन्नुभयो ।
सङ्क्रमित व्यक्तिले आँखा नछुने र छोएपछि गर्नुपर्ने सरसफाइमा विद्यार्थीले हेलचेक्रयाइँ गर्दा सङ्क्रमण तीव्र गतिले फैलिएको ठहरपछि उपमहानगर कार्यालयले सामुदायिक तथा संस्थागत विद्यालय बन्द गर्न निर्देशन दिएको छ । जनकपुरधाम उपमहानगरपालिकाका प्रमुख मनोजकुमार साहले आँखा पाक्ने रोग आवश्यक सतर्कतापछि सामान्यतया केही दिनभित्र आफैँ निको हुने र सामाजिक
दूरी कायम गर्दा संक्रमणको शृंखला टुट्ने भएकाले एक साता विद्यालय बन्द गराउनुपरेको बताउनुभयो ।
जनकपुरधामस्थित श्रीजानकी आँखा अस्पतालका मेडिकल डाइरेक्टर डा.आशीष बोहोराले अन्य दिनमा हाराहारी छसय जति आँखाका रोगी उपचारका लागि अस्पतालको बहिरङ्ग विभागमा आउने भएपनि आँखा पाक्ने रोगका कारण केही दिनयता बिरामीको सङ्ख्या हवात्तै बढेर करिब ११ सय पुगेको जानकारी दिनुभयो । उहाँले आँखा पाक्ने रोगका कारण आँखामा दीर्घकालीन गम्भीर क्षति नपुग्ने र चारपाँच दिनमा निको हुने हुँदा संक्रमण फैलिन सक्ने कुरालाई ध्यानमा राखी बढी भिड हुने अस्पतालहरूमा अत्यावश्यक नहुँदा बिरामीलाई नजान सल्लाह दिनुभयो ।
सङ्क्रमणमा परेकाहरूका आँखा बिहान उठ्दाखेरि टाँसिन सक्ने सामान्य दिनभन्दा बढी चिप्रा लाग्ने समस्या पनि हुनसक्ने चिकित्सकहरू बताउँछन् । आँखा पाक्ने रोगबाट आँखाको झिल्लीजस्तो तहमा असर पार्ने हुँदा चिकित्सक वा विशेषज्ञको सल्लाहअनुसार मात्र औषधि प्रयोग गर्नुपर्ने उहाँहरूको भनाइ छ । डा.बोहोराले संक्रमित व्यक्तिको आँखा दुख्ने र आँसु आइरहने हुँदा बरफबाट आँखा सेक्न र कालो चश्मा लगाउन सुझाउनुभयो ।
-original-thumb.jpg)
