चन्द्र पन्दाक
ताप्लेजुङ, साउन १७ गते । ताप्लेजुङमा पनि डेङ्गु रोगका सङ्क्रमित फेला परेका छन् । जिल्ला अस्पताल ताप्लेजुङमा बिरामीको परीक्षणका क्रममा डेङ्गु सङ्क्रमित फेला परेका हुन् ।
शङ्कास्पद बिरामीको स्वास्थ्य परीक्षणका क्रममा छ जनामा डेङ्गु सङ्क्रमण पुष्टि भएको जिल्ला अस्पतालका मेडिकल सुपरीटेनडेन्ट डाक्टर ओमप्रकाश थापा मगरले जानकारी दिनुभयो । डा. थापामगरका अनुसार सङ्क्रमण पुष्टि भएकामध्ये जिल्ला अस्पतालमा उपचारपछि पाँच जना घरमै स्वास्थ्य लाभ गरिरहेका छन् ।
एकजना ८० वर्षीय वृद्ध भने जिल्ला अस्पतालमा उपचाररत रहनुभएको उहाँले जानकारी दिनुभयो ।
जिल्ला अस्पतालका अनुसार धरान, विराटनगर र झापाबाट ताप्लेजुङ आएकाहरुमा डेङ्गु सङ्क्रमण पुष्टि भएको हो । कोही तराईतिर रहँदै सङ्क्रमित भएर आएका र केहीमा पछि डेङ्गु सङ्क्रमण देखापरेको पाइएको अस्पतालले जनाएको छ । यसरी हिमाली जिल्लामा समेत डेङ्गु सङ्क्रमित फेला पर्नु सामान्य नभएको डा. थापा मगरको भनाइ छ ।
-original-thumb.jpg)
