.jpg)
शशिधर पराजुली
विराटनगर, साउन १२ गते । नेकपा (एमाले) संसदीय दलका नेता तथा निवर्तमान मुख्यमन्त्री हिक्मतकुमार कार्कीले सर्वोच्च अदालतको आदेश बमोजिम अहिले आफू नै कामचलाउ मुख्यमन्त्री भएको दाबी गर्नुभएको छ ।
विराटनगर विमानस्थलमा पत्रकारसँग संक्षिप्त कुरा गर्नुहुँदै उहाँले सो दाबी गर्नुभएको हो । सर्वोच्च अदालतको आदेशलाई आधार मानेर मन्त्रालय जाने र नियमित कामकारवाहीलाई अगाडि बढाउने उहाँले बताउनुभयो ।
सर्वोच्च अदालतको आदेशमा सभामुखको हस्ताक्षरलाई आधार मानेर नयाँ मुख्यमन्त्री नियुक्त गर्ने कार्य संविधानविपरीत भएकाले सो त्रुटि भएकै बिन्दुबाट नयाँ मुख्यमन्त्री नियुक्त गर्न भनिएको उहाँले बताउनुभयो । नेता कार्कीले उक्त आदेशका आधारमा आफूले मुख्यमन्त्रीको रुपमा काम गर्ने प्रतिक्रिया दिनुभयो ।
निवर्तमान मुख्यमन्त्री कार्कीले भन्नुभयो, ‘कहिलेकाहीँ व्यक्ति र संस्थाबाट कमजोरीहरु हुन्छन्, अब उहाँहरुले यस्तो कमजोरी नगर्नुहोला ।’ पत्रकारले सभामुखको राजीनामाको विषयमा सोधेको प्रश्नमा उहाँले त्यस्तो प्रतिक्रिया दिनुभयो ।
नेता कार्कीले कोशी प्रदेश सरकारको स्थायित्व विकास र सुशासनका निम्ति नेपाली कांग्रेससमेतको सहभागितामा सरकार गठन गर्न सकिने पनि बताउनुभएको छ ।
‘हामी यस विषयमा कुराकानी गर्छौं, सहमतिको वातावरण बनेमा मुख्यमन्त्री को हुने भन्ने कुरा मुख्य हुँदैन, कांग्रेसलाई मुख्यमन्त्री बनाएर जाने विषयमा पनि हामी खुला छौं’ कार्कीले भन्नुभयो ।
