वेश्या रचेलको हातमा
थपक्क आफ्नो कान काटेर राखिदिने
म पागल भ्यानगग होइन
आफ्नो सेक्सी हात माथि
पागल, प्रेमी र पेन्टर भ्यानगगले राखेको
रगत चुहिरहेको कान हेर्दै
रचेल चिच्याएकी थिई–
मलाई एउटा इमानदार, बलियो
र मायालु पुरुष चाहिएको थियो
पागल होइन ।
रावणले भगाएर लगेकी सीता खोज्दै
समुद्र पारि लङ्का पुगेर
रावणको हत्यापछि दरबार फर्केर
गर्भवती सीतालाई गलहत्याउने
म मर्यादापुरुष राम पनि होइन ।
कामातुर भएर शकुन्तलालाई
ऋषि आश्रममा भोगेर
दरबार फर्केपछि कामको व्यस्तताले बिर्सेको बहाना गर्ने
अल्झाइमरग्रस्त राजा दुष्यन्त पनि
म होइन ।
न गोपिनीहरूले घेरिएर
राधासँग अलौकिक प्रेममा मस्त
कृष्ण नै हुँ म
न भ्यानगग, न राम, न कृष्ण, न दुष्यन्त
कस्तो प्रेमी हुँ त म ?
म खोजीमा छु ।
