उद्यममा जम्दै तानसेन नगरपालिकाका महिला

बिन्दु थापा 

तानसेन, असार ६ गते । तानसेन नगरपालिका –४ कि भुना थापालाई उद्यमी महिला भनेर सम्बोधन गर्दा खुसीले मन प्रफुल्ल हुनेगर्छ । आफ्नो होजियरी फर्म यो अवस्थामा आइपुग्ला भनेर उहाँलाई विश्वास थिएन । तर गरेपछि हुन्छ भन्ने अनुभव भएको उहाँको भनाइ छ ।  

सामान्यतया घरायसी प्रयोगका लागि स्थानीय सीप र प्रविधिको प्रयोग गरी निर्वाहमुखी तरिकाले जीवन चलाइरहेको भए पनि तानसेन नगरपालिका र मेड्पाको तालिम लिएर उद्योग खोल्न सकेको उहाँले बताउनुभयो ।   

थापा आजभोलि गृहिणीबाट व्यवसायी महिला बन्नुभएको छ । होजीयरी व्यवसायले एकातिर उहाँको परिचय फेरिएको छ भने अर्कोतर्फ उहाँको जीवनस्तरमा समेत परिवर्तन ल्याएको छ । थापा मात्र होइन, होजियरीबाट १० जना महिला उद्यमी बन्न सफल हुनुभएको छ ।  

उहाँहरूको दैनिकी मात्रै फेरिएको छैन, पहिचान पनि कायम भएको छ । होजियरी उद्यमी रुमकलाले भन्नुभयो, “घरमा बसेर केही गर्दैन भन्ने घरको काम सबै एक्लै गर्नुपर्ने थियो । तर आजभोलि व्यवसाय सुरु गरेपछि घरको काममा पनि सबैले सघाउने गर्नुभएको छ । समाजका दिदीबहिनीले पनि जागिर गर्न थालेपछि फरक दृष्टिकोणले हेर्ने गर्नुभएको छ ।  पहिले दुई–चार रुपियाँका लागि नपत्याउनेहरू आजभोलि सापटी माग्न आउन थालेका छन् ।”

आफ्नै मेहनत र परिश्रमबाट छोराछोरी हुर्काउनेदेखि शिक्षासम्म यही होजीयरीको कमाइले खर्च चलाउन अहिले दिदीबहिनीलाई गाह्रो छैन । महिला उद्यमी भनेर हिँड्दा साँच्चिकै केही गर्नमा ढिला भएको अनुभव भएको उहाँले बताउनुभयो ।  

थापा र रानाजस्तै उद्यमी महिला बन्नुभएकी विमला भट्टराई ढल्कँदो उमेरमा उद्यमी महिला भनेर चिनिन पाउँदा औधी खुसी भएको बताउनुभयो । आर्थिक जोहो पनि हुने, आफ्नो खर्च चलाउन अरूसँग हात थाप्न नपर्दा आनन्द आउने उहाँको भनाइ छ । 

१० जना महिला मिलेर नगरपालिकाको आयोजनामा सात दिने इन्टरप्रेनरसिप तालिम लिएर व्यवसाय गर्नुपर्छ भन्ने लागेर ४५ दिनको होजीयरी तालिम लिएर होजीयरी उद्योग खोलेका हुन् । प्रत्येक सदस्यबाट १० हजार रुपियाँ उठाएर एउटा मेशिन र एक बन्डल धागोबाट सुरु गरेको होजियरी उद्योगमा बुन्ने, सिलाउने र इन्टरलक गर्ने मेशिन गरेर ३ वटा मेशिन नगरपालिकाले प्रोत्साहनस्वरुप प्रदान गरेको छ । 

महिला दिदीबहिनी मिलेर केही गर्न सकिन्छ भन्ने गतिलो उदाहरण बन्न सफल १० जना दिदीबहिनीको होजीयरीमा उत्पादन भएका खादा, स्विटर अन्य डिजाइनका मखलरहरु हेर्दा लोभलाग्दो देखिन्छ । 

व्यावसायिक रूपले उद्योग सञ्चालन गर्नेहरूका लागि सरकारले आर्थिक र प्राविधिक सहयोगका कार्यक्रम ल्याएकोमा खुसी लागेको उद्यमी महिलाको भनाइ छ । व्यावसायिक उद्योग खोल्दा र सञ्चालन गर्दा पुरुषको सहयोगविना काम गर्न सकिँदैन भन्ने मानसिकता बोकेका महिलाका लागि आफूहरू उदाहरण बनेको उद्यमी महिलाको बुझाइ छ ।