भवानी ऐर
गोदावरी (कैलाली), जेठ २५ गते । सुदूरपश्चिम प्रदेश सरकारका सामाजिक विकासमन्त्री झपटवहादुर साउदले समाजको सकारात्मक विकासमा युवाहरूको भूमिका महत्त्वपूर्ण रहने बताउनुभएको छ । प्रदेश युवा परिषद्ले बिहीबार धनगढीमा आयोजना गरेको सामाजिक विकास मन्त्रीसँग युवाहरूको अन्तरक्रिया कार्यक्रममा उहाँले सो कुरा बताउनुभएको हो ।
कार्यक्रममा सहभागी युवाहरूको सवालको जवाफ दिँदै मन्त्री साउदले समाजको सकारात्मक विकासका लागि आफू सधैँ युवासँगै रहने प्रतिबद्धता जनाउनुभयो । युवाहरूको शिक्षा, स्वास्थ्य, खेलकुद, रोजगारीलगायतका सवालको जवाफ दिँदै मन्त्री साउदले आफूमा पनि केही गरेर देखाउने हुटहुटी रहेकाले हाम्रो स्रोत र साधनले भ्याएसम्म युवाहरूका यी समस्या समाधानमा लाग्ने प्रतिबद्धता व्यक्त गर्नुभयो ।
कर्णालीमा पुल बनेपछि मात्रै काठमाडौंसँग सुदूरपश्चिम भौगोलिक हिसाबले नजिक भएको स्मरण गर्दै उहाँले अब सङ्घीयताले विकासको ढोका खोल्नुपर्ने बताउनुभयो । तराई पहाड र हिमाल मिलेको सुदूरपश्चिम प्रदेश अभावमा अब नरहेर र सम्भावनाको खोजी गरेर जनतालाई उत्साहित बनाउने बताउनुभयो ।
प्रदेश सरकारले ल्याएको नीति तथा कार्यक्रममा शिक्षा, स्वास्थ्य, स्वरोजगार, युवा सशक्तीकरण, खेलकुद, हाम्रो भाषा संस्कृतिको संरक्षणलगायतका विषय सम्बोधन गरेकाले सोहीअनुसार बजेटको तयारीमा रहेको उहाँको भनाइ छ ।
सबै क्षेत्रको सहभागिताबिना सदियौँदेखि पछाडि पारिएको सुदूरपश्चिमको समृद्धि सम्भव नहुने मन्त्री साउदको भनाइ छ । युवालगायत सबैको साथ–समन्वय आवश्यक रहेको बताउँदै त्यसका लागि प्रदेश सरकारको सामाजिक मन्त्रालय अभिभावकको भूमिका निभाउन तयार रहेको बताउनुभयो ।
