हो, अतीतसँग पैँचो लिई लिई
म वर्तमान जिउने प्रयत्न गरिरहेको छु
तर प्रश्नहरू ठडिन छाडेका छैनन्–
कुन जीवन ? कस्तो जीवन ?
सारहीन अस्तित्वको कुन अर्थ ?
कस्तो अर्थ ?
प्रश्नहरू अनेक छन्
संशय अनेक छन्
मेरो इतिहास
मौन रहनका लागि
बाध्य किन बनाइएको छ ?
अग्निपरीक्षाको पृष्ठभूमिको
खोजी किन गरिँदैन ?
जिज्ञासाहरूको हठात समन
विद्रोहको कारण बन्न सक्छ ।
तर आश्चर्य
जनकको भूमिमा
अष्टाबक्रहरूको अश्तित्वमाथि
शान्तिको नाममा पटक पटक
आक्रमण हुन्छ
जानकीका सपनाहरू
माटोमुनि छोपिन्छन-छोपिएको छ
र पटक पटक आयोजना हुन्छ अग्निपरीक्षाहरू ।
ए तिमी सुन्दैछ्यौ नि ?
हो तिमीलाई नै भनिरहेको छु,
अग्निपरीक्षापश्चात् पनि
तिमीले विद्रोह गर्न किन सकिनौ ?
र किन, माटोमुनि पुरिएर बस्यौ ?
सायद यिनै प्रश्नको उत्तरको अभावमा
विद्रोह र समर्पणबीचको
भेद बुझ्न
म सधैँ असफल रहेँ ।
सायद त्यसैले मेरा खुट्टा
सधैँ लरबराइरहेँ
विद्रोहको कुरा गर्दा
कथित संस्कारले मलाई
अगाडि बढ्नबाट रोक्छ,
तर कहिलेसम्म रोकिएला र ?
सुन्छ्यौ भने तिमी सुन–
म अतीतका आधारमा
वर्तमान जिउने
प्रयत्न त्यसबेलासम्म गरिरहन्छु
जबसम्म तिमी
नवविद्रोह गर्दिनौ ।।
