वर्तमान हामी
बगे पनि, जमे पनि
बाफिए पनि, वर्षिए पनि
हाम्रो अस्तित्व एउटै हो !
तिमी पनि पानी, म पनि पानी
बाफ बनेर उड्दै गर्दा आकाशमा
कहिलेकाहीँ सुटुक्क भेटौँला
झरौँला सँगसँगै
सिञ्चित गरेर मायाका बस्तीहरूलाई
चुमेर सुक्खा बगरहरूलाई
अनि बगौँला आफ्नो–आफ्नै दिशातर्फ
ठिकै छ, तिमी मेची बनेर बग्नु
म महाकाली बनेर बगौँला
घुम्दै–फिर्दै भविष्यमा
जसरी सुरु भएथ्यो, मायाको भूल
त्यसैगरी दुवै मिलेर
बनाउँला एउटा प्रेम गङ्गा
तिमी पनि पानी, म पनि पानी ।
