प्रकाशित सामग्रीको प्रस्तुति र गुणस्तरमा सुधार

गोरखापत्र राष्ट्रिय दैनिकले आज प्रकाशन थालनीको १२३औँ वर्ष प्रवेश तथा संस्थान स्थापनाको ६१औँ वार्षिकोत्सवको सुखद अवसरमा गोरखापत्र तथा गोरखापत्र संस्थानमा कार्यरत सञ्चारकर्मी तथा सबै कर्मचारीलाई बधाई ज्ञापन गर्दछु ।

नेपालको पहिलो प्रकाशनका रूपमा वि.सं. १९५८ सालको वैशाख २४ गतेबाट ‘गोर्खापत्र’ को प्रकाशन प्रारम्भ भएको हो । वि.सं. १९९१ वैशाख ९ गतेदेखि गोर्खापत्र प्रत्येक हप्ताको शुक्रबार प्रकाशित भएको थियो । अर्धसाप्ताहिकको वि.सं. २००० असोज २९ गते सातामा मङ्गलबार र शुक्रबार गरी दुई पटक प्रकाशन हुँदै २००३ साल पुस ८ गतेदेखि सातामा तीन पटक प्रकाशित भएको थियो । वि.सं २०१७ फागुन ७ गतेदेखि दैनिक रूपमा प्रकाशित भएको थियो । यस महत्वपूर्ण दिनमा गोरखापत्रका संस्थापक एवं संस्थान र पत्रिकाको निरन्तर विकासका निम्ति अहोरात्र खट्नुहुने सबैप्रति स्मरण गर्दै आभार प्रकट गर्दछु ।

१९५८ वैशाख २४ देखि निरन्तर प्रकाशित गोरखापत्र नेपाली पत्रकारिताको ऐतिहासिक संस्था हो । नेपाली पत्रकारिताको संस्थागत विकासमा यसको महìवपूर्ण योगदान छ । राष्ट्रको इतिहास र सभ्यता जोडिएको यो संस्थालाई अहिलेको डिजिटल युग सुहाउँदो बनाउन आन्तरिक सुधार तथा पुनर्संरचना आवश्यक छ । पछिल्ला दिनमा गोरखापत्र तथा अन्य प्रकाशनको लेआउट डिजाइनमा भएको परिवर्तनसँगै यसको सामग्रीको प्रस्तुति र गुणस्तरमा देखिएको सुधार स्मरणीय छ, आगामी दिनमा यसलाई थप परिमार्जित र विकसित तुल्याउने जिम्मेवारीसमेत गोरखापत्रमा आबद्ध सञ्चारकर्मी र कर्मचारीको काँधमा छ । 

नागरिकलाई निरन्तर सूचना र शिक्षा प्रदान गर्दै आएको गोरखापत्र एउटा पत्रिका मात्र होइन । एउटा युगको जीवन्त प्रतिनिधि हो । आजका मितिसम्म पनि सबैभन्दा विश्वासिलो र सर्वाधिक हेरिने वा पढिने पत्रिका गोरखापत्र हो । शताब्दी लामो यात्रा पार गरिसकेको गोरखापत्रको हाम्रो सामाजिक विकास र संस्कृति प्रवद्र्धनमा महìवपूर्ण योगदान छ । यो संस्थाले इतिहासका थुप्रै आरोहअवरोह पार गरेको छ ।

समयको माग र प्रविधिको गतिअनुसार अब यो संस्थाले पनि आफूलाई रूपान्तरण गर्न जरुरी छ । अहिलेको प्रतिस्पर्धात्मक बजारमा आफूलाई अझ खरो रूपमा उतार्न यो संस्थाले अझ जिम्मेवार, व्यावसायिक तथा विश्वसनीय भएर आफूलाई अघि बढाउनुपर्छ । डिजिटल मिडियाको तीव्र विकास तथा विस्तारसँगै छापा पत्रकारिताको यात्रा थप चुनौतीपूर्ण बन्दै गएको छ । त्यसैले गोरखापत्रले आफ्नो परम्परागत ढाँचा तथा ढर्रा परिवर्तन गरेर नयाँ 

ढङ्गले अघि बढ्नुपर्छ । राज्यप्रतिको जिम्मेवारीमा सचेत रहँदै सबै नेपालीले स्वामित्व लिने सामग्री पस्किनुपर्छ । अब सूचनाका लागि मात्र पत्रिका कुर्ने अवस्था नरहेकाले सामग्रीको गुणस्तर र विविधतामा विशेष ध्यान दिनु जरुरी छ ।

राज्यका सबै कामकारबाही पारदर्शी हुनुपर्दछ । राज्यका निकायले गर्ने कार्य सम्पादनका बारेमा जनसमक्ष ल्याउने दायित्व आमसञ्चार माध्यमको नै रहन्छ । नागरिक सुसूचित हुनसक्दा मात्र सङ्घीय लोकतान्त्रिक गणतन्त्र सबल बन्न सक्छ । राज्यका हरेक अङ्ग र निकायलाई कार्यसम्पादनप्रति जिम्मेवार, उत्तरदायी र सबल बनाउन चौथो अङ्गका रूपमा सञ्चारमाध्यमले निर्वाह गर्ने भूमिका महìवपूर्ण हुनसक्छ । त्यसैले सञ्चार माध्यमलाई ‘वाच डग’ का रूपमा लिने गरिएको छ । यो भूमिका आगामी दिनमा अझ सशक्त बन्न सक्नुपर्दछ । सही सूचना र जानकारीबाट सूचित हुने नागरिकको अधिकार प्रत्याभूत गर्न आमसञ्चार जिम्मेवार बन्न सक्नुपर्दछ । आजको सन्दर्भमा आमसञ्चारको भूमिका र योगदान प्रशंसनीय छ ।

गोरखापत्र संस्थान र गोरखापत्रको नेतृत्व सुशासन र समृद्धिको लक्ष्यप्रति जवाफदेही र इमानदार रहेर मात्र आमसञ्चार जगत्मा सरकार र सरकारी सञ्चार माध्यमप्रतिको विश्वसनीयता कायम राख्न र अभिवृद्धि गर्न सकिन्छ । पछिल्लो समय संस्थानको नेतृत्वको इमानदारिता र कार्यक्षमतामाथि उठेका प्रश्नको व्यवहारद्वारा प्रतिउत्तर दिन पनि म विशेष रूपले ध्यानाकर्षण गराउँछु । संस्थाको नेतृत्वले जहिले पनि निष्पक्षता, स्वतन्त्रता, संस्थागत एवं पेसागत हित र सुरक्षा, संस्थाभित्र कार्यरत सदस्यहरूको वृत्तिविकास र अभिभावकत्वमा विशेष ध्यान दिनुपर्छ । संस्थाप्रति सबैको अपनत्वबोध हुने भौतिक एवं भावनात्मक परिस्थितिको निर्माण गरेर मात्र नेतृत्वले आफ्नो क्षमता प्रस्तुत गर्न सक्छ, जसको बलमा संस्थाले थप परिस्करणका साथ उचाइ हासिल गर्न सक्छ । यसतर्फ यहाँहरू सबैको ध्यान जाने नै छ भन्ने मैले विश्वास लिएको छु ।

अन्त्यमा, आजको ऐतिहासिक दिनले गोरखापत्रमा कार्यरत सबै सञ्चारकर्मी एवं कर्मचारीमा नयाँ ऊर्जा र आत्मविश्वासका साथ काम गर्ने प्रेरणा र वातावरण पैदा होस्, गोरखापत्रलाई प्रतिस्पर्धी र आधिकारिक सूचना सम्प्रेषणको निर्विकल्प सञ्चारमाध्यमका रूपमा विकास गर्न सफलता प्राप्त होस्, दैनिक घटनाक्रम मात्र नभएर नीतिगत र परिणाममुखी कामको विश्लेषण आमपाठकसम्म पु¥याउन थप रचनात्मक भूमिका निर्वाह गर्न सकोस् । यही अपेक्षा र विश्वासका साथ फेरि एक पटक गोरखापत्र संस्थान र गोरखापत्र दैनिकको निरन्तर प्रगतिको शुभेच्छासहित बिदा हुन्छु, धन्यवाद ।

(गोरखापत्र दैनिकको १२३औँ तथा गोरखापत्र संस्थानको ६१औँ वर्ष प्रवेशका अवसरमा आइतबार राष्ट्रिय सभा गृहमा आयोजित समारोहमा सम्माननीय प्रधानमन्त्री पुष्पकमल दाहाल ‘प्रचण्ड’ ले गर्नुभएको सम्बोधनको पूर्ण पाठ)