झुल्नेटामा लक्ष्मीको एटीएम सेवा

मुसीकोट समाचारदाता

रुकुमपश्चिम, चैत २३ गते । लक्ष्मी बैङ्कले रुकुमपश्चिमको त्रिवेणी गाउँपालिका–३, झुल्नेटामा बुधबारबाट एटीएम सेवा सञ्चालनमा ल्याएको छ । बैङ्कको झुल्नेटा शाखाले १८०औँ एटीएम सेवाका रूपमा उक्त सेवाको शुभारम्भ गरेको जनाएको छ । 

त्रिवेणी गाउँपालिका अध्यक्ष गणेश केसीले एटीएम सेवाको उद्घाटन गर्नुभएको हो । उद्घाटन कार्यक्रममा अध्यक्ष केसीले बैङ्कको सेवा प्रवाहलाई थप व्यवस्थित र छरितो बनाउन एटीएम सेवा महत्वपूर्ण हुने विश्वास व्यक्त गर्नुभयो । 

ग्राहकको मागलाई ध्यानमा राख्दै औपचारिक रूपमा एटीएम सेवा सञ्चालनमा ल्याएको लक्ष्मी बैङ्क त्रिवेणी शाखाका प्रबन्धक रूपशिला डाँगीले जानकारी दिनुभयो । लक्ष्मी बैङ्कले हाल देशभर १४४ शाखा, १४ एक्सटेन्सन काउन्टर र १८० एटीएम सेवामार्फत सेवा प्रवाह गर्दै आएको बताइएको छ ।