मिटरब्याजीको आरोपमा जनमत पार्टीका नेता शर्मा पक्राउ

देवराम प्रसाद यादव

सप्तरी, चैत २० गते । सप्तरीमा मिटरब्याजीको आरोपमा जनमत पार्टीका केन्द्रीय सदस्यलाई प्रहरीले पक्राउ गरेको छ । जनमत पार्टीका केन्द्रीय सदस्य सुरेन्द्र शर्मालाई सोमबार बिहान राजविराजबाट प्रहरीले पक्राउ गरेको हो । 

इलाका प्रहरी कार्यालय कल्याणपुरको प्रहरीले  शर्मालाई ठगी गरेको मुद्दामा पक्राउ गरिएको जिल्ला प्रहरी कार्यालय सप्तरीका डिएसपी एव प्रवक्ता नरेश कुमार सिंहले जानकारी दिनुभयो ।

पक्राउ परेका शर्मा माथि थप आवश्यक अनुसन्धान कार्य भइरहेको प्रवक्ता सिंहले बताउनुभयो । यता सरकारले गत शनिबार मात्र पीडितसँग पाँच बुँदे सहमति गर्दै मिटरब्याजीलाई कानुनी दायरामा ल्याउने प्रतिबद्धता जनाएको थियो । 

यसअघि जनमत पार्टीका केन्द्रीय सदस्य शर्माले मिटरब्याज स्वरूप विभिन्न व्यक्तिहरूबाट करोडौँ रकम असुली गरेको आरोप सहितका समाचार विभिन्न सञ्चारमाध्यमहरू प्रकाशन/प्रसारण भएको थियो ।