राजन रावत
हुम्ला, फागुन २२ गते । तीन महिनादेखि बेपत्ता भएका एक जना पुरुष मृत भेटिएका छन् । प्रहरी र आफन्तले लगातार खोजी गर्ने क्रममा सर्केगार्ड गाउँपालिका –२ को उनापानीस्थित कर्णाली नदीको किनारमा उहाँको शव फेला पारेको हो ।
प्रहरी नायब उपरीक्षक भीमलाल भट्टराईले बेपत्ता भएका पुरुषको तीन महिनापछि लास भेटिएको बताउनुभयो । गत मङ्सिर १४ गते बेपत्ता भएका खार्पुनाथ गाउँपालिका –४ को नल्न गाउँका २८ वर्षीय पुरुष जसबहादुर शाहीको शव फागुन २१ गते बेलुका भेटिएको हो । त्यसयता शाही बेपत्ता रहनुभएको थियो ।
शाही बेपत्ता भएको तेस्रो दिन मङ्सिर १६ गते मृतक शाहीका दाइ कालीबहादुर शाहीले खोजीका लागि अस्थायी प्रहरी चौकी याङ्चु बजारमा निवेदन दिनुभएको थियो । शाही बेपत्ता भएदेखि नै आफन्त तथा प्रहरीले उहाँको खोजी गर्दैआएको थियो । उहाँले उनापानीको कर्णाली नदी किनारमा बेपत्ता शाहीको लास भेटिएको मृतकका आफन्त सुरेन्द्र शाहीले बताउनुभयो ।
शव भेटिएको जानकारी पाएलगत्तै प्रहरी निरीक्षक दीपक मल्लको नेतृत्वमा प्रहरी घटनास्थल पुगेको थियो । आफन्तले शव शाहीकै भएको पुष्टि गरेको छ । शाही घरबाट खच्चडमा सामान ढुवानी गरेर ल्याउन सलीसल्लातर्फ जाँदैगर्दा बेपत्ता हुनुभएको थियो ।
