युवालाई आत्मनिर्भर बन्न आग्रह

काठमाडौँ, फागुन २० गते । प्रधानमन्त्री पुष्पकमल दाहाल ‘प्रचण्ड’ले युवा आत्मनिर्भर र स्वावलम्बी भए आर्थिक समृद्धि हासिल गर्न सकिने बताउनुभएको छ। राष्ट्रिय युवा परिषद् आठौँ वर्ष प्रवेशको अवसरमा शुक्रबार शुभकामना सन्देश दिनुहुँदै उहाँले युवालाई उद्यमशील र स्वरोजगार बनाउन जोड दिनुभएको हो। 

राजनीतिक, सामाजिक, सांस्कृतिक तथा आर्थिक परिवर्तनको संवाहक मानिने युवा शक्तिलाई परिचालन गर्न परिषद्ले युवा केन्द्रित नीति तथा कार्यक्रम निर्माण गरेर अगाडि बढ्न आवश्यक रहेको चर्चा उहाँले गर्नुभएको छ। शुभकामना सन्देशमा प्रधानमन्त्री प्रचण्डले भन्नुभएको छ, “परिषद्ले सरकारका विभिन्न निकायलाई आवश्यक नीति तथा कार्यक्रमको नमुना विकास गरी हस्तान्तरण गर्दै आएको छ।” तर  सीमित बजेट र स्रोत–साधनका बाबजुद पनि परिषद्ले छोटो अवधिमा युवाको जागरण, सशक्तीकरण र नेतृत्व विकासका क्षेत्रमा सकारात्मक अगुवाइ गरिरहेको उहाँको भनाइ छ। प्रधानमन्त्री प्रचण्डले परिषद् युवाको बृहत्तर हित र राष्ट्र निर्माणको कार्यभारमा अझ प्रभावकारी भएर अगाडि बढ्ने विश्वास व्यक्त गर्नुभयो। 

यसैगरी परिषद्का अध्यक्ष सुरेन्द्र बस्नेतले समृद्ध राष्ट्र निर्माणको मेरुदण्डका रूपमा रहेका युवालाई स्वरोजगार र आत्मनिर्भर बनाउनुपर्ने बताउनुभयो। उहाँले युवा शक्तिलाई विकास र समृद्धिको अभिन्न अङ्ग बनाएर समाजवादोन्मुख राज्य प्रणाली निर्माण गर्नुपर्नेमा जोड दिनुभयो। सरकारले २०७२ फागुनमा राष्ट्रिय युवा परिषद् स्थापना गरेको थियो।