बानी (कविता)

घाम लाग्दा घामै हुने पानी पर्दा पानी 

जस्तो सुकै परे पनि बस्यो सहने बानी ।।

जाडो खोज्दा तातो हुने तातो खेज्दा चिसो

जुन कुरा नचाहँदा त्यही लाग्छ लिसो ।

निष्ठुरी छ प्रकृति नै  गर्छ मनोमानी 

दिनसम्म दुःख दिन्छ आफैँ छानी छानी ।।

भतभती तताउँछ आगो परे सरी

कहिले फेरि ठिराउँछ रगतै जम्ने गरी ।

भने जस्तो हुनुपर्ने भयो अप्ठेरो बानी 

आँधी, हुरी, खडेरी र वर्षा बन्छ हानि ।।

निहुँ मात्रै अति खोज्छ काबुभित्र छैन 

दुनियाँ नै सताउँछ सुख दिने हैन ।

कस्तो कता भोगाउँछ आफै तानी 

निसानामा परेको छ हाम्रो जिन्दगानी ।

घाम लाग्दा घामै हुने  पानी पर्दा पानी 

जस्तो सुकै परे पनि बस्यो सहने बानी ।।