रमेश पौडेल
पोखरा, फागुन ७ गते। पोखराको लेखनाथस्थित डाँडाकोनाक प्रहरी चौकी अगाडि बस दुर्घटना भएको छ। आइतबार दिउँसो भएको दुर्घटनामा चालकसहित ४९ जना घाइते भएका छन्। पोखरा विश्वविद्यालयबाट पोखरातर्फ आउँदै गरेको ग १ ख ६७४७ नम्बरको लेखनाथ मिनी माइक्रो बस दुर्घटनामा परेको हो।
दुर्घटनामा चालकसहित ४९ जना घाइते भएको जिल्ला प्रहरी कार्यालय कास्कीका प्रवक्ता ज्ञानबहादुर खड्काले जानकारी दिनुभयो। जिल्ला ट्राफिक प्रहरी कार्यालय कास्कीका प्रवक्ता शिवप्रसाद पाठकका अनुसार घाइतेको उद्धार गरेर पोखराको पश्चिमाञ्चल क्षेत्रीय अस्पताल र गण्डकी मेडिकल कलेजमा ल्याइएको छ।
घाइतेमध्ये केहीको अवस्था गम्भीर छ। बस सडकबाट खोल्सामा खसेको छ। बसमा अधिकांश पोखरा विश्वविद्यालयबाट फर्किँदै गरेका विद्यार्थी सवार थिए। उनीहरू भोलि हुने दीक्षान्त समारोहमा भाग लिनका लागि गएका थिए।
