बालाजु घटनामा संलग्न थप १५ जना पक्राउ

काठमाडौं, फागुन ४ गते । बालाजुको माछापोखरीमा फागुन १ गते भएको यातायात मजदुर सङ्गठनले गरेको प्रदर्शनमा प्रहरीको गाडीमा आगजनी गर्ने र ल्होत्से मलमा भएको चोरीमा संलग्न थप १५ जनालाई प्रहरीले पक्राउ गरेको छ ।

काठमाडौं उपत्यका अपराध अनुसन्धान कार्यालयबाट खटिएको प्रहरीको टोलीले उनीहरूलाई काठमाडौंका विभिन्न स्थानबाट पक्राउ गरिएको जानकारी दिनुभयो । 

पक्राउ परेका अधिकांश व्यक्तिहरू चालक, सहचालक तथा यसअघि पनि विभिन्न आपराधिक घटनामा संलग्न रहेको पाइएको कार्यालयले जनाएको छ । उनीहरूलाई पक्राउ गरी थप अनुसन्धान तथा कारबाहीका लागि प्रहरी वृत्त बालाजु र महाराजगन्ज पठाइएको अनुसन्धान कार्यालयले जनाएको छ ।

प्रहरीले ल्होत्से मलमा भएको चोरीमा तीन जना र आगजनी तथा तोडफोडमा संलग्न १२ जनालाई पक्राउ गरिएको हो ।

पक्राउ पर्नेमा काभ्रे घर भएका १९ वर्षीय सुरज मगर (ताप्ले), उदयपुरका ३० वर्षीय रितेश बस्नेत (भेना) र मोरङ बेलबारी घर भएका  ३० वर्षीय यमन राई छन् । उनीहरू ल्होत्से मलबाट मोबाइल चोर्दै गरेको भिडियोमा देखिएका हुन् ।

यसैगरी, आगजनी र तोडफोडमा संलग्नहरू नुवाकोट घर भएका १८ वर्षीय सुनिल कालिकोटे, माछा पोखरी घर भएका २२ वर्षीय रोमन नगरकोटी, नुवाकोट घर भएका १८ वर्षीय सुदिप तामाङ, मापा पोखरीमा व्यापार गर्ने ३३ वर्षीय माधव शाही, नुवाकोट घर भएका १९ वर्षीय केशव राई र सिन्धुली घर भएका १८ वर्षीय इन्द्र तामाङ छन् ।

त्यस्तै, पक्राउ पर्नेमा धादिङ घर भएर तार्केश्वर बस्ने २६ वर्षीय चालक ईलाराज गुरुङ, उदयपुर घर भएका २७ वर्षीय सह–चालक राजन राउत, काभ्रे घर भएका २८ वर्षीय चालक हरिशरण तामाङ, धादिङ घर भएका १८ वर्षीय सहचालक विकास गुरुङ, चितवन घर भएका २७ वर्षीय चालक संविधान परियार र सामाखुसी घर भएर होटेलमा वेटर काम गर्ने १९ वर्षीय कविन खड्गी रहेका छन् ।