काठमाडौं, फागुन ३ गते । प्रतिनिधि सभा सदस्य राजेन्द्रप्रसाद पाण्डेले यातायात व्यवस्था विभागले जारी गरेको सवारी चालक अनुमति पत्र परीक्षा सञ्चालन कार्यविधि निर्देशिका २०७७ गलत भएको बताउनुभएको छ ।
बुधबार बसेको प्रतिनिधि सभा बैठकको विशेष समयमा बोल्नुहुँदै सांसद पाण्डेले विभागले जारी गरेको सो निर्देशिका अनुसार नेपालमा दुई खालका लाइसेन्स प्रयोगमा आउने भन्दै त्यसको विरोध गर्नुभएको हो ।
सांसद पाण्डेले भन्नुभयो, ‘‘यो कुराले सरकार गलत बाटोमा छ र यदि लाइसेन्स दिनै मन भए यो खालको मापदण्ड परिवर्तन गर्नुपर्छ । ७० नम्बरका लाई नै लाइसेन्स दिन मन भए पनि रातो बत्ती बाल्दाबाल्दै गाडी क्रस गर्न पाउने व्यवस्था हुनुहुँदैन । यदि यस्तै हुने हो भने गाउँमा नागरिकता टोली आउँदाखेरि टेबल राखेर नागरिकता बाँडेको झैँगरी बाँडिदिए भइगयो नि त । एसइई पास गरेको विद्यार्थीलाई एउटा लाइसेन्स पनि लिएर जाऊँ सँगसँगै यो सर्टिफिकेट सँगसँगै लिएर जाऊँ भने भइगयो नि । किन यो ट्रायल गर्नुपर्यो ? किन यो परीक्षा गर्नुपर्यो ? अब नेपालका लाइसेन्स दुई खालका हुनेभए ।’’
यस निर्देशिका अनुसार मोटरसाइकल, स्कुटर, मोपेड, कार, जिप, डेलिभरी भ्यानका लागि ७० नम्बर ल्याउँदा चालक हुन पाउने र ट्रक, बस, ट्याङ्कर, एक्स्काभेटर, डोजर आदिलाई १०० नम्बर ल्याउनुपर्ने प्रावधान हुँदा दुई खालको लाइसेन्स हुने उहाँको भनाइ छ । त्यसो हुनु गलत भएको सांसद पाण्डेले बताउनुभयो । उहाँले यस्तो प्रावधान हुनुले ४० प्रतिशत राजश्व घटाउने, कर्मचारीको तजबिजी अधिकार बढ्ने, परीक्षाका लागि कर्मचारी र लागत बढ्ने हुँदा खर्च बढ्दै जाने धारणा व्यक्त गर्नुभयो ।
सांसद पाण्डेले यस प्रावधानले नेपालको लाइसेन्स अन्तर्राष्ट्रिय स्तरमा अमान्य हुनसक्ने पनि बताउनुभयो ।
