काठमाडौं, माघ १४ गते। सत्तारुढ प्रमुख घटक नेकपा (एमाले)का महासचिव शङ्कर पोखरेलले मुलुकलाई राजनीतिक अस्थिरताको दुश्चक्रममा फसाउने प्रयास भइरहेको टिप्पणी गर्नुभएको छ। सर्वोच्च अदालतको आदेशबाट उपप्रधान तथा गृहमन्त्री रवि लामिछानेको पद खारेज भएलगत्तै उहाँको यस्तो अभिव्यक्ति सार्वजनिक गर्नुभएको हो।
एमालेद्वारा शनिबार ललितपुरको च्यासलस्थित पार्टी केन्द्रीय कार्यालयमा आयोजित ‘शहीद स्मृति कार्यक्रम’मा बोल्दै उहाँले मुलुकमा देखापरेको राजनीतिक अस्थिरताको खेललाई सही बाटोमा अघि बढाउन एमाले दृढ सङ्कल्पित रहेको समेत बताउनुभयो।
महासचिव पोखरेलले नेपाली राजनीतिमा देखारेको पछिल्लो राजनीतिक परिस्थितिप्रति आफ्नो पार्टी गम्भीर रहेको उल्लेख गर्दै त्यसलाई सफलतापूर्वक सामना गरेर अघि बढ्ने दाबी गर्नुभयो।
उहाँले भन्नुभयो, ‘‘राजनीतिक अस्थिरतको दुष्चक्र कायम गर्ने जुन कोसिस गरिएको छ। त्यसलाई नेकपा (एमाले) सफलतापूर्वक सामना गर्दै अघि बढ्न तयार छ। अहिले नेपाली राजनीतिमा जुन प्रकारका अस्थिरताका खेल भइरहेका छन्। नेकपा (एमाले) त्यसप्रति अन्त्यत गम्भीर छ। सचेततापूर्वक त्यसलाई सही बाटोमा अघि बढाउनका लागि दृढ सङ्कल्पित रहेको कुरा यहाँ उल्लेख गर्दछु।’’
महासचिव पोखरेलले एमालेले शहीदको सम्मानमा कमी आउन नदिने गरी मुलुकलाई अघि बढाउने प्रयास गरिरहेको पनि बताउनुभयो।
