काठमाडौं, माघ १० गते । नेपाली कांग्रेसका वरिष्ठ नेता रामचन्द्र पौडेलले मुलुकमा व्याप्त समस्या समाधान गरेर अघि बढ्न दलहरुबीच सहमति, सहकार्य र राष्ट्रिय एकताको खाँचो रहेको बताउनुभएको छ ।
आज (मङ्गलबार)को प्रतिनिधि सभा बैठकमा नवनिर्वाचित सभामुख र उपसभामुखलाई बधाई एवम् शुभकामना दिनुहुँदै कांग्रेसका वरिष्ठ नेता पौडेलले मुलुकलाई अप्ठ्यारो परेको अवस्थामा सबै दल एक हुनुपर्ने आवश्यकता औँल्याउनुभयो ।
मुलुकको कमसल आर्थिक अवस्था, भूराजनीतिक दबाब, सुशासनको कमजोर अवस्थालाई सुधार तथा शान्ति प्रक्रियाका बाँकी काम पूरा गर्न दलहरुबीच गहिरो एकताको खाँचो रहेको बताउनुभयो ।
“राष्ट्रिय सहमति गरौँ, सबैले मिलेर राष्ट्र निर्माण गरौँ, देशलाई एकताबद्ध बनाउन सबै एक ठाउँमा जुटौँ,” उहाँले भन्नुभयो, “नेपालको आकाशबाट निराशाको कालो बादल हटाउन राष्ट्रिय सहमतिको वातावरण बनाऔँ ।”
आफू पहिलेदेखि नै राष्ट्रिय सहमतिको पक्षमा रहेको जनाउँदै उहाँले देशलाई अप्ठ्यारो परेको अवस्थामा सबै राजनीतिक दल एक हुनुपर्ने बताउनुभयो । “देशमा सुशासनको आवश्यकता छ । अहिले कुशासन व्याप्त छ । हामीले शासन प्रणाली विकेन्द्रित ग¥यौँ, तर भ्रष्टाचार तलसम्म गएको छ,” नेता पौडेलले भन्नुभयो, “एउटा दलको आड लागेर भ्रष्टाचारी जोगिने अवस्था छ । त्यसलाई निरुत्साहित गर्न सबै दल एक ठाउँमा उभिनु जरुरी छ । सुशासनका लागि एकताका आवश्यकता छ ।”
मुलुकको विकासका लागि आर्थिक स्रोतका कमी हुँदै गएको जनाउँदै उहाँले अनुदान दिने प्रवृत्ति पनि कम हुँदै जाँदा मुलुकको विकास निर्माण प्रभावित हुनसक्ने खतरा रहेको औँल्याउनुभयो । “अर्थतन्त्र धान्न नसक्ने अवस्थातर्फ जाने देखिँदै छ । सामाजिक सुरक्षाको खर्च बढिरहेको छ । यो खर्च कसरी उठाउने ?,” उहाँले भन्नुभयो, “निर्मम शैली अपनाएर खर्च कटौती गर्नु जरुरी छ ।”
विप्रेषण (रेमिट्यान्स)को भरमा मात्र मुलुक चल्न नसक्ने उल्लेख गर्दै उहाँले विप्रेषणलाई उत्पादनमूलक क्षेत्रमा खर्च गर्ने वातावरण बनाउन आग्रह गर्नुभयो । “रेमिमट्यान्सले कति दिन धान्छ ? रेमिटयान्स आउँछ उत्पादन क्षेत्रमा खर्च भइरहेको छैन । अनुत्पादन क्षेत्रमा खर्च भइरहेको त्यसलाई उत्पादन क्षेत्रमा मोड्ने कसरी ?,” नेता पौडेलले भन्नुभयो, “त्यसका लागि सबै दल एक हुनुपर्ने आवश्यकता छ ।”
प्राप्त राजनीतिक उपलब्धिलाई चुनौती दिने तत्त्व अझै जुरमुराइरहेको जनाउँदै उहाँले संविधान ल्याउन लागेको दलहरू प्राप्त उपलब्धि जोगाउन एक ठाउँमा हुने कि नहुने ? भन्ने प्रश्न आमरुपमा उठेको बताउनुभयो । “कांग्रेस र कम्युनिष्ट मिलेर नेपालमा प्रजातन्त्र र लोकतन्त्र आएको हो, अब त्यसलाई रक्षा गर्न कांग्रेस र कम्युनिष्ट एक ठाउँमा हुने कि नहुने ?,” उहाँले भन्नुभयो ।
दलहरूको विभाजित मानसिकताबाट लोकतन्त्र जकडिएको जनाउँदै उहाँले लोकतन्त्रलाई जोगाएर अगाडि लैजान सहमतिको आवश्यकता रहेको बताउनुभयो । “सामाजिक, सांस्कृतिक मूल्यको स्खलन डरलाग्दो छ । यसबाट मुक्त हुन एक हुने कि नहुने,” उहाँले भन्नुभयो, “निराशाका घण्टीहरू बजिरहेका छन्, नकारात्मक प्रवृत्ति आइरहेका छन्, ती असन्तुष्टिलाई सम्बोधन गर्ने दायित्व हाम्रो हो कि होइन ?”
पछिल्ला समय मुलुकमा राजनीतिक नेतृत्वको अभाव र राष्ट्रिय आत्मविश्वासको अभाव हुँदै गएको महसुस हुन थालेको उहाँको भनाइ छ । “सत्ताको राजनीतिको दबदबा, निष्ठाको राजनीतिक किनारा लाग्दै गएको छ । निष्ठाको राजनीतिलाई जोगाउन एकताको खोजी गर्नुपर्नेछ,” नेता पौडेलले भन्नुभयो, “नेतृत्वले विश्वास गुमाएको अवस्था हो । त्यसलाई महसुस गरौँ ।” सकारात्मक सोच, सहमति, सहकार्यको सोचबाट मात्रै राष्ट्रिय नेतृत्व प्राप्त हुन सक्ने उहाँको विश्वास छ ।
विधिको शासन नै लोकतन्त्र भएको जनाउँदै उहाँले विधिको सुशासनलाई सबैले मान्नुपर्ने बताउनुभयो । “सभामुखले पूर्वाग्रही विचार राख्नुहुँदैन, यसबाट जोगिएर काम गर्नुहोला । सभामुखले निष्पक्षरुपमा काम गर्दा संसदमा आरोप प्रत्यारोप हुनसक्छ, त्यसतर्फ सचेत हुनुपर्छ,” उहाँले भन्नुभयो । रासस
