चरीकोट समाचारदाता
चरीकोट, माघ १० गते । दोलखा सदरमुकाम चरीकोटस्थित पशुपति चौलागाईं स्मृति अस्पतालको सेवा निःशुल्क गर्न सरोकारवालाले माग गरेका छन् ।
सात वर्षदेखि निःशुल्क सेवा दिँदै आएको सो अस्पतालले माघ १ बाट शुल्क लिन सुरु गरेपछि स्थानीयले सेवा शुल्क निःशुल्क गर्न माग गरेका हुन् ।
दोलखा उद्योग वाणिज्य सङ्घ, नेपाल बार एसोसिएसन, नेपाल पत्रकार महासङ्घलगायत संस्थाका प्रतिनिधिले अस्पताल व्यवस्थापनसँग स्वास्थ्य सेवा निःशुल्क गर्न माग गरेका छन् । अस्पताल सञ्चालन गर्न भन्दै सेवाग्राहीसँग रकम लिने विषयमा हालै गरिएको निर्णयप्रति गम्भीर ध्यानाकर्षण भएको जनाउँदै ती संस्थाले संयुक्त विज्ञप्ति जारी गरी स्वास्थ्य सेवा पाउने अधिकार सुनिश्चित गरी निःशुल्क स्वास्थ्य सेवा उपलब्ध गराउन माग गरेका छन् ।
अस्पताल सञ्चालनका लागि स्रोत अभाव हुँदै गएको र व्यवस्थापनमा सङ्कट चुलिँदै गएको देखाएर सेवाग्राही र सरोकारवालासँगको छलफलबिनै महँगो शुल्क निर्धारण गर्नु खेदजनक रहेको नागरिक अगुवा रमेश खतिवडाले बताउनुभयो ।
पशुपति चौलागाईं स्मृति अस्पताल दोलखाली गरिब र विपन्न नागरिकको बाँच्ने सहारा भएकाले हाल कायम शुल्क तत्काल खारेज गरी अस्पताल सञ्चालनका लागि चाहिने जनशक्ति र स्रोतको खोजी सरकारीस्तरबाटै गर्न माग गरिएको छ । त्यसैगरी सरोकारवालासँग छलफल गरेर मात्र अघि बढ्न अस्पताल व्यवस्थापन समितिसमक्ष माग गरिएको नागरिक समाजका अगुवा चिरञ्जीवी मास्केले बताउनुभयो । अस्पतालमा हाल अक्सिजन प्लान्टलगायतका उपकरण रहेर पनि चालू अवस्थामा नरहेकाले ती उपकरण तत्काल सञ्चालन हुने व्यवस्था मिलाउन माग गरिएको छ ।
अस्पताल सञ्चालन एवं व्यवस्थापन समितिको निर्णयअनुसार माघ १ देखि अस्पतालमा राष्ट्रिय स्वास्थ्य बीमा कार्यक्रम कार्यान्वयन गर्ने निर्णय गर्दै बीमा कार्यक्रममा सूचीकृत नभएका बिरामीसँग सेवा शुल्क लिन सुरु गरिएको थियो । अस्पतालका प्रमुख डा. ज्ञानेश्वर श्रेष्ठले आर्थिक बोझ थपिँदै जान थालेपछि शुल्क लिन थालेको बताउनुभयो ।
अस्पतालमा निःशुल्क स्वास्थ्य सेवा प्रदान गर्न मासिक करिब १२ देखि १५ लाख रुपियाँबराबरको रकम लाग्ने तर अस्पतालको आम्दानीको स्रोत भनेको चमेनागृह, निजी फार्मेसीमार्फत उठ्ने घरभाडा मात्र छ । अब निजी फार्मेसी पनि हटाएर अस्पतालले नै फार्मेसी चलाउने डा. श्रेष्ठले बताउनुभयो । अस्पतालमा कार्यरत आधा कर्मचारीको तलब प्रदेश सरकारबाट आउने गरेको र आधाको तलब अस्पतालले आन्तरिक स्रोतबाट दिइरहेको छ ।
अस्पतालमा हाल ७२ जना कर्मचारी कार्यरत छन् । तीमध्ये प्रदेश सरकार, सङ्घीय सरकार र नगरपालिकाबाट स्थायी र करार गरी ३७ जनाको तलब जाने गरेको छ । बाँकी ३५ जनाको तलब आन्तरिक स्रोतबाटै भुक्तानी गरिरहेको अस्पतालले जनाएको छ ।
उक्त अस्पताल विदेशी गैरसरकारी संस्थाले सात वर्षअघि विशेषज्ञसहित निःशुल्क सेवा दिने गरी १० वर्षका लागि जिम्मा लिएकोमा गत वर्ष उसले बीचैमा हात झिकेको थियो । त्यसयता प्रदेश सरकार र अस्पतालका विभिन्न अन्य स्रोतबाट निःशुल्क सेवा सुचारु गरिँदै आएको थियो ।
