धर्बेन्द्र झा
धनुषा, पुष २८ गते । मिडिया काउन्सिल मधेश प्रदेशले बिहीबार आफ्नो वार्षिक बुलेटिन सार्वजनिक गरेको छ । मधेश प्रदेशको राजधानी जनकपुरधाममा आज आयोजित एक कार्यक्रमबीच मधेश प्रदेश सरकारका गृह तथा सञ्चारमन्त्री भरतप्रसाद साहसहितले सो बुलेटिन सार्वजनिक गर्नुभएको हो ।
बुलेटिनमा सञ्चार क्षेत्र र सञ्चारकर्मीको विभिन्न पक्षबारेमा पत्रकारद्वारा लेखिएको लेखहरू समावेश गरिएको छ । ११२ पृष्ठ रहेको सो वार्षिक बुलेटिनमा समयक्रमअनुसार सञ्चार जगतले भोगेको समस्या र चुनौतीका बारेमा विषय समेटिएका छन् ।
मधेस प्रदेश सरकारका गृह तथा सञ्चारमन्त्री साहले मिडिया काउन्सिलले वार्षिक बुलेटिनमा समेटेका विषयलाई अझै व्यापक बनाउनु पर्ने धारणा राख्नुभयो । पत्रकार हकहितको सवालमा प्रदेश सरकार प्रतिबद्ध रहेको र पत्रकारसँगकै छलफलमा सञ्चार ऐन ल्याएको बताउनुभयो ।
सञ्चार ऐनले सञ्चार क्षेत्रमा देखिएका समस्यालाई समाधान गर्न मद्दत पुगेको बताउनुभयो । उहाँले देशमा सङ्घीयता आए पनि अझै अधिकार प्राप्त हुन नसकेको र अधिकार प्राप्तिका लागि अदालत धाउनु परेको बताउनुभयो । प्रहरी र कर्मचारी समायोजन भएमा धेरै समस्याहरू समाधान हुने उहाँको भनाइ छ ।
मिडिया काउन्सिलका कार्यवाहक अध्यक्ष कैलाश दासको अध्यक्षतामा भएको कार्यक्रममा मधेश प्रदेश सरकारका गृह तथा सञ्चार मन्त्रालयका सचिव रामकुमार महतो, नेपाल पत्रकार महासङ्घका केन्द्रीय सदस्य रिंकु मिश्र, मधेश प्रदेशका अध्यक्ष राजेश कर्ण, वरिष्ठ पत्रकार रामभरोश कापडी, रामभरत साह, रमेशरञ्जन झा, रोशन जनकपुरीसहितकाले पत्रकारिता क्षेत्रमा देखिएका चुनौती र त्यसको समाधानका लागि काउन्सिलले निर्वाह गर्नुपर्ने सुझाव दिनुभएको थियो ।
